 |
| Manifestasaun MUTL hasoru PN, UNTL; 16-08-2017 |
Ezijénsia Movimentu Universitáriu Timor-Leste (MUTL) hasoru Parlamentu Nasionál ho ajenda Kontra Leilaun Prado no Rejeita desizaun polítika Sosa Karreta foun ba Membru Parlamentu Nasionál la’ós ona asuntu salgadu ba Povu Timor-Leste nia futar tilun no matan, hahú husi Povu ai-leba, Estudante, Juventude to’o sírkulu akademiku universitáriu, veteranu, sosiedade sivíl, entidade relijioza to’o lider nasaun sira.
Iha sírkulu akademiku universitáriu, lidun balun entende no mós komprende asuntu refere, no Universitáriu lubuk balun ne’ebé iha pozisaun hanesan Universitáriu abuzivus, ne'ebé dependente ba númeru valor estudu no orientasaun dosente, sira nunka mais preokupa asuntu refere, hanesan asuntu nasionál ne'ebé interligadu hanesan problema sosial ne'ebé iha implikasaun ba interese nasionál, sira lakon nia papél nu’udar ajente kontrolu sosial no transformasaun sosial. Iha sírkulu públiku (Komunidade), sira konxiente katak asuntu Leilaun Prado no Desizaun polítika Sosa Karreta foun ba Membru Parlamentu Nasionál ne’e aktu korruptu ne'ebé halimar no estraga povu nia osan, maibé elite polítiku sira influénsia nafatin sira ho enganasaun polítika, to’o povu barak konsume enganasaun polítika sira ne’e hodi akuza fali nia oan sira ne'ebé sai matan, tilun, ibun no fuan ba sira ne’e hanesan autór inpedimentu ba estabilidade ka autór instabilidade nasionál. Iha sírkulu entidade seluk hanesan veteranu, sosiedade sivíl no órgaun relijioza, sira konxiente no entende mós ho asuntu ne’e, maibé dala barak sira nia ibun namtaka ho osan ne'ebé tinan-tinan aloka ba sira nia bolsu, priór liu tan mak lider nasionál sira, sira ne’e hakesir ho polítika kongkalikong hodi fahe projetu no povu nia osan ba malu, no ikus labele halo intervensaun ba nia maluk sira iha uma fukun Parlamentu Nasionál tanba ta’uk lakon poder, kargu, projetu no osan.
Bainhira mandatu Parlamentu Nasionál III lejizlatura atu hotu, Parlamentu Nasionál liu husi desizaun plenária hatún desizaun polítika ida ba konsellu Administrasaun hodi administra leilaun ba karreta prado ne'ebé Membru Parlamentu Nasionál III lejizlatura sira uza durante mandatu tinan lima (5) hahú husi 2012 to’o 2017, ho kustu leilaun $ 8.000,00 ba kada karreta ida, públiku só kadu ho desizaun polítika refere, entidade dahuluk ne'ebé kestiona asuntu ne’e mak sosiedade sivíl sira balun, iha altura ne’ebá duni, Movimentu Universitáriu Timor-Leste (MUTL) afirma nia-an liu husi desizaun koletiva nivel universitáriu, hahú halo peskiza ba asuntu refere, no ikus mai iha Loron 15 fulan Agostu Tinan 2017, Movimentu Universitáriu Timor-Leste (MUTL) inisia komunikadu imprensa ida iha resintu Kampus UNTL, hodi ezije ba Parlamentu Nasionál III lejizlatura atu hapara leilaun no entrega hikas karreta Prado refere ba PN atu Membru Parlamentu Nasionál tuir mai bele utiliza fali.
Razaun fundamental husi ezijénsia Movimentu Universitáriu Timor-Leste (MUTL) mak, Karreta Prado refere sei iha kondisaun ne'ebé di'ak, no kustu leilaun menus liu husi kustu depresiasaun/sosa, tanba karreta refere sosa ho folin $ 59.000,00 to’o $ 65.000,00 maibé leilaun ba $ 8.000,00 de’it , aktu ida ne’e Movimentu Universitáriu Timor-Leste (MUTL) konsidera hanesan manipulasaun regra, konflitu interese ida ne’ebé maka nakonu ho diskriminasaun sosial, inklui mós viola prinsípiu luta ba libertasaun povu maubere tanba la komunga prinsípiu efisiénsia ba utilizasaun patrimóniu estado nian. (Korrupsaun Legal). Tuir Diploma Ministerial Ministério das Finansas númeru 15/2012, 30 de Maiu nian hatudu prosesu leilaun nia kontabilidade katak Karreta Prado ne’ebé Parlamentu Nasional III Lejizlatura leilaun ne'e, uzadu ona durante tinan 5, no konta tuir depresiasaun 13,33% ho valor residual 20%. no folin depresiasaun $ 8.645 kada tinan sei hetan Folin depresiasaun $ 43.225 ba tinan 5, Signifika iha nia kontajen lolos, karreta prado refere, sei leilaun ho folin $ 21.775 laos $ 8.000. iha parte ne’e MUTL deskonfia katak eis Membru parlamentu III lejizlatura, ema ida manipula $ 13775. Depoizde komunikadu imprensa, MUTL hato’o petisaun ida ho konteúdu bazeadu ba Baze Legal Servisu de alienasaun hanesan:
- Decreto Lei Númeru : 32/2011, de 27 Julho, Gestão e alienação do Bens Moveis do Estado.
- Despaxu 13/MDF-MI/VIII/2011, Nomeação dos Membros da Comissão de Leilões.
- Diploma Ministerial MDF. Númeru 01/2010, de 8 de Marco kona ba “Regime de Gestão do Inventáriu e Gestão dos Bens e moveis.”
- Diploma Ministerial Ministério das Finansas númeru 15/2012, 30 de Maiu kona ba Prosesu Leilaun
Lei hirak ne’e Parlamentu Nasionál taka de’it ho Lei Nú.15/2008 kona bá organizasaun no Funsionamentu Administrasaun Parlamentár ne'ebé fó Autónomu Patrimoniál ba Parlamentu Nasional hodi halo rezolusaun autónomu. Ho razaun katak Parlamentu Nasionál ne’e órgaun soberanu ida ne'ebé iha autonomia. Entaun MUTL konsidera desizaun polítika ida ne’e hasees husi prinsípiu boa governasaun no boa fé iha Parlamentu Nasionál. (La lojiku, irasional no nakonu ho interese).
Hafoin loron ida komunikadu imprensa, iha Loron 16 fulan Agostu Tinan 2017, ajenda MUTL muda sai manifestasaun ho tipu demonstrasaun ka asaun pasifika iha Resintu Kampus UNTL, to’o iha Loron 20 fulan Agostu Tinan 2017, asaun manifestasaun ho tipu demonstrasaun ka asaun pasifika hamosu situasaun anarkizmu, no parte seguransa PNTL konsege kaptura Manifestante 13 hodi detein iha sela detensaun preventiva durante 72 oras.
Depoizde ida ne’e, kada bankada partidu iha uma fukun Parlamentu Nasionál ida-idak halo deklarasaun ba públiku hodi entrega hikas karreta Prado ba Parlamentu Nasionál, iha altura ne’e duni, reprezentante MUTL ne'ebé lidera husi porta voz Atanáziu hasoru malu ho Deputadu Bankada Parlamentár sira, no Eis Presidente Parlamentu Nasionál III lejizlatura Exelénsia senhor Adérito Hugo hatún despaxu ida hodi muda leilaun ba alienasaun.
Desizaun polítika ne'ebé Parlamentu Nasionál III lejizlatura foti, hanesan alternativu ne'ebé so bele hakmaan de’it ezijénsia MUTL, maibé laiha benefísiu ba interese nasionál, tanba muda leilaun ba alienasaun hanesan aktu ne'ebé hanesan ho prosesu ne'ebé diferente de’it. Entaun ezijénsia Movimentu Universitáriu Timor-Leste (MUTL) la hakotu iha ne’e, manifestasaun ho tipu demonstrasaun ka asaun pasifika husi MUTL kontinua nafatin to’o Parlamentu Nasionál IV lejizlatura funsiona. Iha mandatu Parlamentu Nasionál IV lejizlatura ne'ebé lidera husi Exelénsia senhor Aniceto Guterres hatún tan despaxu ida iha Loron 04 Fulan Marsu Tinan 2018 ho númeru Despaxu 315/SG/2017, ba Konsellu Administrasaun Parlamentu Nasionál, no hola ona desizaun hodi hapara leilaun Karreta Prado ho folin $ 8.000,00 Mil, através Konsellu Sekretariadu Parlamentu Nasionál, de-volver fila-fali ona osan $ 8.000,00 ne’e bá konta bankária Eis Membru Parlamentu Nasionál III lejizlatura ida-idak, no determinasaun bá anulasaun husi Konsellu Administrasaun Parlamentu Nasionál hatur ona katak labele tan akontese leilaun inklui mós hola Karreta Prado foun ba Membru Parlamentu nasional ho tipu karreta ne’ebé mak hanesan tanba folin Karreta Prado ne’e karun tebes.
Bainhira desizaun polítika iha IV lejizlatura akontese, Eis Membru Parlamentu Nasionál III lejizlatura hamutuk 20 ital pessoa konsege hatama duni, hafoin impase polítika iha 2017-2018 hamosu Eleisaun Antesipada tanba Parlamentu Nasionál IV Lejizlatura disolve husi Presidente da Repúblika. Entaun Movimentu Universitáriu Timor-Leste (MUTL), hakoruk ba interese nasionál hodi hapara manifestasaun temporariamente hodi hein prosesu Eleisaun Antesipada to’o hotu. Depoizde Eleisaun Antesipada hotu, Parlamentu Nasionál V lejizlatura hetan tomada de posse, Movimentu Universitáriu Timor-Leste (MUTL), re-afirma an hodi ezije fila-fali Parlamentu Nasionál V lejizlatura hodi rekolla dokumentu Eis Membru Parlamentu Nasionál III atu entrega hotu Karreta Prado ne'ebé sira sei privatiza ba Parlamentu Nasionál V lejizlatura hodi utiliza ba funsionamentu servisu Parlamentu Nasionál, tanba iha ona despaxu husi Parlamentu Nasionál IV Lejizlatura. Portantu, Presidente Parlamentu Nasionál V Lejizlatura, Senhor Arão Noe hatán duni ezijénsia Movimentu Universitáriu Timor-Leste (MUTL) hodi kontinua despaxu Parlamentu Nasionál IV Lejizlatura no rekolla dokumentu Parlamentu Nasionál III no hatún parecer legal ba Eis Membru Parlamentu Nasionál III ida-idak iha Loron 02 Fulan juilu Tinan 2018, objetivu husi parecer legal ne’e mak atu haruka Eis Membru Parlamentu Nasionál III ida-idak hodi entrega hikas karreta prado ba Parlamentu Nasionál V Lejizlatura.
Iha parte ne’e, Movimentu Universitáriu Timor-Leste (MUTL) konkorda ho desizaun polítika refere, hodi hein rezultadu final. Maibé realidade hatudu buat seluk, karreta prado foin entrega de’it 30 no restu seidauk entrega hotu, Parlamentu Nasionál V Lejizlatura hamosu tan polítika foun iha Loron 21 Fulan Outubru Tinan 2018, iha plenária estraordinária, aprezenta tan proposta sosa karreta foun ba Membru Parlamentu Nasionál V Lejizlatura nia, no deputadu sira diskute no halo votasaun hodi aprova orsamentu privativu ba 2019, iha plenária ne’e, deputadu sira vota hodi aprova osan ba sosa karreta foun ho marka Pajero, ho folin hamutuk biliaun 2 rihun atus 7 resin, no alitera ba biliaun 1 rihun atus rua 30 tanba sosa de’it ba deputadu 48. Hafoin plenária estraordinária iha Loron 21 Fulan Outubru Tinan 2018, Movimentu Universitáriu Timor-Leste (MUTL), re-afirma an kedas hodi halo komunikadu imprensa iha loron 23 Fulan Outubru Tinan 2018 hodi kontra desizaun polítika ne'ebé Parlamentu Nasionál V Lejizlatura hasai hodi sosa karreta foun, no Movimentu Universitáriu Timor-Leste (MUTL) konsidera Parlamentu Nasionál lakon ona nia boa fé atu serbi povu, Parlamentu Nasionál bosok ona povu, no viola mós sira nia desizaun rasik, tanba Parecer legal ne'ebé sira halo hodi haruka Eis Membru Parlamentu Nasionál III Lejizlatura atu entrega hikas karreta prado ba Parlamentu Nasionál V Lejizlatura ne’e seidauk hetan rezultadu final.
Komunikadu imprensa husi Movimentu Universitáriu Timor-Leste (MUTL), iha loron 23 Fulan Outubru Tinan 2018 hasoru desizaun polítika ne'ebé Parlamentu Nasionál V Lejizlatura hasai hodi sosa karreta foun, nakfilak sai asaun pasifika iha Loron 26 Fulan Outubru Tinan 2018 to’o ohin loron, seidauk iha finalidade. Movimentu Universitáriu Timor-Leste (MUTL) hanoin katak, Parlamentu Nasionál V Lejizlatura daudauk ne’e laiha kometimentu no konsisténsia, antes ne’e sira ko’alia iha públiku katak kustu manutensaun karreta prado boot liu, tanba ne’e imposivel atu dada hikas karreta tuan husi Eis Membru Parlamentu Nasionál III Lejizlatura atu Membru Parlamentu Nasionál V Lejizlatura utiliza ba sia nia funsionamentu servisu.
Movimentu Universitáriu Timor-Leste (MUTL) konsidera Parlamentu Nasionál bosok ona povu, sira viola ona sira nia desizaun rasik, sira viola mós prosedimentu legal sira ne'ebé sira rasik halo. Tuir lolos, Parlamentu Nasionál hanesan órgaun segundo estado nian iha dever moral, atu hola desizaun polítika obrigatório hodi kontinua despaxu husi Parlamentu Nasionál V Lejizlatura nian, Maibé realidade saida mak akontese, Parlamentu Nasionál V Lejizlatura ne'ebé lidera husi senhor Arão Noe ho nia membru deputadu sira la iha kometimentu, laiha konsisténsia polítika, laiha ona moral polítika, laiha ona etika profisionalizmu.
Ignora despaxu refere, signifika sira lakon ona nia boa fé atu serbi povu ida ne’e, ho sira nia polítika pamper, sira hamosu tan polítika ida atu sosa karreta bá deputadu foun sira, ho razaun katak atu hala’o nia funsaun ba fiskalizasaun, ho polítika imoral ida ne’e, la akumula opiniaun públiku sira, liu-liu ezijénsia Movimentu Universitáriu Timor-Leste (MUTL) nian ne'ebé diskórdia totalmente desizaun Parlamentu Nasionál hodi sosa karreta foun, tanba hare ba situasaun real, desizaun refere la’ós alternativa atu hadi’a povu nia moris no mal gasto bá orsamentu geral do estado nian, tanba ne’e Movimentu Universitáriu Timor-Leste (MUTL), kontinua halo asaun pasifika ho tipo demonstrasaun hasoru Parlamentu Nasionál V Lejizlatura atu kontinua Despaxu 315/SG/2017, kontinua uza karreta tuan. Membru deputadu sira iha Parlamentu Nasionál labele hetan privilégio sa’e prado, ho polítika irasional membru Parlamentu Nasionál V Lejizlatura la iha ona seriedade servisu, la transparénsia bá povu, tanba ne’e, Movimentu Universitáriu Timor-Leste (MUTL), hanesan organizasaun Sombriña ne’ebé mak hamahon Estudante Universitáriu, Asosiasaun Universitáriu, Movimentu Universitáriu, Klibur Estudante Universitáriu no Povu Timor-Leste tomak, hamriik hodi tuba bá defende direitu povu hanesan agente kontrolu sosial no transformasaun sosial ho misaun prinsipal tolu mak hanesan luta hodi kombate diskriminasaun sosial iha Timor-Leste, Luta hodi Kombate Korrupsaun iha Timor-Leste no Luta hodi kombate Esplorasaun Ema ba Ema iha Timor-Leste, hodi hatur estadu de direitu demokratiku Timor-Leste ida ne’ebé mak nakonu ho integridade no sempre tane bá prinsípiu no valores direitu umanu. Tanba ne’e Movimentu Universitáriu Timor-Leste (MUTL) mós hakarak re-afirma nia an hodi hatete lae bá kualkér desizaun ida ne’ebé mak ita nia órgaun soberania sira iha Timor-Leste, ka elite polítiku sira foti maibé la reflete bá povu nia moris.
Ho polítika sosa karreta ba deputadu foun sira, Movimentu Universitáriu Timor-Leste (MUTL) hare ba aspetu ekonomia no sosial la fó benefísiu bá povu, ho razaun katak, iha area rurál sira, eskola kondisaun ladi’ak, saúde matrimoniál do’ok husik komunidade, bee mós la iha, povu sei hamlaha, no sei iha liña pobreza, husi assunto hirak ne’e Movimentu Universitáriu Timor-Leste (MUTL) akumula Estudante Universitáriu, Asosiasaun Universitáriu, Movimentu Universitáriu, Klibur Estudante Universitáriu no Povu Timor-Leste tomak hodi kontra desizaun Parlamentu Nasionál V Lejizlatura nian ne'ebé ho polítika pamper atu sosa karreta bá membru deputadu foun sira, tanba desizaun polítika refere laiha benefísiu ida ne'ebé bele fó ré-tornu porsentu ida bá estadu.
Movimentu Universitáriu Timor-Leste (MUTL) sei tuba nafatin, hodi defende no hatur justisa sosiál sein diskriminasaun, tuir Konstituisaun RDTL no Lei haruka, laiha liafuan, kolen, ta’uk dukur no nonok ba injustisa, firme no afirma an hodi hatete lae bá kualkér desizaun polítika ne'ebé la reflete bá povu nia moris, direitu no dignidade.
Hakerek Na’in: Z-ray Ulhamousic Vilela
Lé Mos: Antisipa Leilau Prado Iha Futuru
0 komentar :
Post a Comment
Komentariu lao ho Etika