Lospalos News - Rezolusaun Parlamentu Nasional III Legislatura ba Leialaun Patrimonio estado (Leilaun Kareta Prado) konsideradu hanesan manipulasaun regra, konflitu interese ida ne’ebe maka nakonu ho diskriminasaun sosial, inklui mos viola prinsípiu luta ba libertasaun povu tanba la komunga prinsípiu efisiénsia ba utilizasaun património estado nian. (Korupsaun Legal).
Tuir Lei Nú.15/2008 konaba organizasaun no Funsionamentu Administrasaun Parlamentár fó Autónomu Patrimonial ba Parlamentu Nasional ne’ebe konsgra iha artigu datoluk (3) alínea ida (1), katak fo Autónomu Patrimonial ba Parlamentu Nasional hodi halo rezolusaun autónomu maibé la signifika membru parlamentu nasional (Deputados) sira bele deside rezolusaun autónomu ne’ebé hase’es hosi prinsípiu boa governasaun no boa fé iha Parlamentu Nasional hodi Leilaun Karreta Prado, tamba kontra Baze Legal Servisu de alienasaun:
-Decreto Lei Numeru : 32/2011, de 27 Julho,Gestao e alienacao do Bens Moveis do Estado.
-Despacho 13/MDF-MI/VIII/2011, Nomeação dos Membros da Comissão de Leilões.
-Diploma Ministerial MdF. Numeru 01/2010, de 8 de Marco kona ba “Regime de Gestao do Inventario e Gestao dos Bens Imoveis.”
Hanesan konsagra iha Diploma Ministerial Ministerio das Finanças numeru 01/2010 defini katak Ministerio no Instituisaun Estado ida-ida maka iha kompetencia tomak atu deklara património ne’e be tama ona klasifikasaun leilaun nian, hafoin Funcionario DNGPE kolabora identifika iha linha ministerios no instituisaun sira hodi rekolha mai iha armazen Departamento de Alienasaun, DNGPE hodi bele klasifika no rekomenda ba Governo liu husi Ministerio das Finanças hodi fo ninia apresiasaun hafoin bele haruka ba Comissão de Leilòes hodi aprova.
Maibe iha realidade, Parlamentu Nasional III Legislatura, la halo tuir prosedimentu ne’e, Parlamentu Nasional manten nafatin ho Lei Nú.15/2008 kona-ba organizasaun no Funsionamentu Administrasaun Parlamentár hodi halo rezolusaun no haluha tiha Baze Legal Servisu de alienasaun, katak, rezolusaun ne’ebe Parlamentu Nasional III Legislatura ho Deputados hamutuk 65 pessoas ne’e kontra ona Baze Legal Servisu de alienasaun ne’ebe mensionadu ona iha leten.
Tuir mai Semak iha kompetensia atu hola dezisaun kona ba prosedimentu de alienasaun ?
Karik Parlamentu Nasional?
Orgaun ne’ebe iha kompetensia total hodi reprezenta Estado no hola dezisaun kona ba prosedimentu de Alienasaun nian ne’e maka Comissão de Leilões ne’ebe kompostu hosi Instituisaun bo’ot lima (5) maka hanesan : Direcção Nacional de Gestão do Património do Estado, Direcção Nacional dos Impostos, Direcção Nacional das Alfandegas, Direcção Nacional do Transporte Terestre, no Direcção do Administração e Finanças do Ministerio do interessado laos Parlamentu Nasional, laos mos Aderito ho Brigida. (Decreto Lei numeru 32/2011, de 27 de Julho).
Depois de desizaun procedimento alienasaun hosi Comissão de Leiloes, maka Diresaun Tekniku patrimonio do Estado sei publika ba publico liu husi meius komunikasaun oin-oin hanesan liu husi Media Electronica, Jornal no taka iha Quadro Aviso iha nivel Nacional no Distrito, Etc. No Publikasaun informasaun sei loke durante loron 14 atu fo tempo ba publico hodi hatama sira nia rekerimentu, hodi bele sosa.
Maibe saida mak, akontese ho rezolusaun leilau prado hosi Parlamentu Nasional III Legislatura ho Deputados hamutuk 65 pessoas? Sira nonok lao tuir sira nia hakarak, no laiha publikasaun, ikus mai deputados 65 pessoas ne’e maka sosa fila fali, ho folin ne’ebe ki’ik liu. Por tanto ida ne’e konsideradu hanesan manipulasaun regra, konflitu interese ida ne’ebe maka nakonu ho diskriminasaun sosial ka bele hanaran korupsaun legan ka traisaun ne’ebe han matak povu nia direitu proprietariu.
Bazeia ba prosedimentu hirak ne’ebe mensionadu iha leten, Parlamentu Nasional Presija tetu didiak sira nia politika ne’ebe realmente lao ho sensibilidade mukit ba situasaun nasaun ne’e, tamba wainhira akontesimentu leilaun ne’e kontinua nafatin, sei nakonu ho konflitu interese, iha abuzu poder, koluzaun, korrupsaun no fó poténsia boot ba Estadu atu lakon valór ne’ebé lolos.
Ba kestaun ne’e, laos manifestasaun deit maka sai alternativu ida hodi bele interven rezolusaun refere, signifika, Tribunál Kontas no Komisaun Anti Korrupsaun (KAK) mos iha kompetensia atu halo audit no investiga Membru Parlamentu Nasionál sira, relasiona ho sira nia rezolusaun ne’e hatudu momos ona katak, kontra Baze Legal Servisu de alienasaun nomos prosedimentu alienasaun.
Hakerek Nain: Z-ray Vilela
Le Mos : Antisipa Leilau Prado Iha Futuru
0 komentar :
Post a Comment
Komentariu lao ho Etika