SITUASAN POLÍTIKA IHA TIMOR LESTE 2017 – 2018, NU’UDAR MALISAN DEMOKRASIA (DEMOKRASI KARMA)
Impase polítika ne’ebé daudaun ne’e Timor-Leste enfrenta hanesan situasaun ida ne’ebé fanun ema hotu nia hanoin, loke ema hotu nia matan no ibun hodi hare, hodi ko’alia, dalan los dia’k saida mak bele solusiona situasaun ida ne’e, maski iha lidun seluk, ema lubuk baluk ida sei taka matan no/ka seidauk konxiente, katak situasaun polítika iha Timor-Leste ida ne’e afeta mós bá nia aan rasik, iha ne’ebé nia rasik labele kore-aan husi situasaun nasaun ida ne’e.
Bazeia bá situasaun real ne’ebé iha, hamosu hanoin ida hodi hakerek na’in foti tópiku iha leten hanesan meiu ida hodi observa situasaun atuál ne’ebé daudaun akontese iha rai Lafaek, hodi hamosu Impase Polítika.
Ita hahú ho interpretasaun ba títulu artigu nian “Situasaun Polítika Iha Timor Leste nu’udar Malisan Demokrasia (Demokrasi Karma)”
Definisaun Polítika nu’udar maneira ka meius ida hodi atinje ba interese ka objetivu ruma tanba interese nunka kore an husi polítika (Interese Polítika), maibé la signifika katak polítika ne’e interese. (Polítika ba Interese)
Lé Mos: Kriminozu Demokrasia Timor Leste
Husi definisaun ne’e, liga ba Situasaun Polítika Timor Leste, katak situasaun ne’e akontese tanba polítika ba interese ne’ebé la hanesan husi grupu balun ou ema polítiku naa’in sira. Ho nune’e kauza husi interese ne’ebé la hanesan, mak hamosu Malisan Demokrasia (Demokrasi Karma). Iha ne’ebé, ita hare fila fali iha tinan 2017 nu’udar tinan dahuluk ba Impase Polítika iha Timor Leste.
Iha loron 22 de Juillu Tinan 2017, nu’udar Momentu especial ba povu Maubere. iha ne’ebé, Timor Leste, hakat ba festa demokrasia ba Dahaat, hodi Povu timor Leste hala’o eleisaun tuir períodu normal kada tinan lima dala ida, ne’ebé hatuur Iha Lei Inan Konstituisaun da Repúblika de Timor Leste iha Artigu 65 kona ba Eleisaun no Alínea ida nia deskreve.
Loron 22 fulan Juillu ne’ebé sai hanesan loron ba Eleisaun Parlamentár iha Timor Leste ba períodu 2017 – 2022 sai mós hanesan loron importante ida ba Povu Timor Leste, tantu mós ba ema jigante ka ema polítiku na’in sira, hodi depozita ba direitu de votu no hili ka vota, Servidór do Estadu ka Reprezentante Povu sira ne’ebé hanaran Ausiliár do Povu, Bazeia ba konsagrasaun Konstituisaun Repúblika de Timor Leste (KRDTL), artigu Hat nulu resin hitu 47, alínea ida no rua.
Reflete ba dadus empires ne’ebé iha, hatudu atravesa de processu no serbisu ne’ebé dezempeña husi CNE ho STAE no hafoin offisial anúnsiu publikadu ida, husi tribunal de rekursu. Iha ne’ebé, partidu Lima (5) mak konsege liu barreira no hakat ba uma fukun parlamentu nasionál mak hanesan;
- Partidu FRETILÍN ho 23 kadeira s
- Partidu CNRT ho 22 kadeira s
- Partidu PD ho 7 kadeira s
- Partidu PLP ho 8 kadeira s
- Partidu KHUNTO 5 kadeira s
Husi rezultadu refere hatudu katak entre partidu kompetidór sira laiha ida mak manan maioria absoluta ho razaun simples katak Multipartidáriu ne’ebé konsagra iha KRDTL, Karik mós hanesan Malisan Demokrasia (Demokrasi Karma) alias povu fó fiar ba partidu polítiku sira ho votu rohan roha’an, “Aneh Tapi Nyata” tanba realidade hatudu, Partidu FRETILIN ne’ebé Apelidu hanesan partidu vermelhu ne’ebé forsa liu iha Sudeste Aziátiku (Observasaun Amérika) mós hetan de’it maioria simples iha tempu ne’ebá. No Partidu CNRT ne’ebé lidira husi Xanana Gusmão ho apelidu (Karizmátiku) mós hetan de’it segundu mais votaadu.
Entretantu, liga ba rezultadu refere hatudu povu timor leste sente kontente no orgullu tanba sei iha governasaun foun ida ne’ebé lori dezenvolvimentu besik liu tan ba sira nia moris liu – liu Saúde, Infraestrutura, Edukasaun , Bee moss, Estrada Nst.... Husi kestaun hirak ne’e nu’udar ezijénsia povu nian no povu nia esperansa ba governu foun depois de eleisaun iha 2017 sei resolve ba nesesidade báziku hirak ne’ebé sita iha leten, maibé ezijénsia no esperansa hirak ne’e, nakfilak ba mehi at povu Timor nian. Tanba elite Polítika sira ne’ebé subar an iha partidu Polítika la konsege fó fuan ho neon ba malu, hodi dudu no aselera lalais ka sedu, ba sá mak povu mehi no durante hein hela. Faktu e realistic katak partidu polítiku ne’ebé ultrapasa barreira ho 4% iha Parlamentu Nasionál iha eleisaun parlamentár tinan 2017 no sai hanesan IV Lezislatura la konsege respeita desizaun povu nian finalidade mak hamosu Impase Polítika ne’ebé la devia atu akontese.
Iha altura ne’e duni, partidu polítiku komesa hatudu idak nia egoízmu no sukat ona ida idak nia forsa Polítika hodi hatudu “Se mak dia’k liu Se no Se mak forsa liu Se” mezmu nune’e, partidu maioria simples FRETILIN hamutuk ho nia aliadu Partidu Demokrátiku (PD) hodi forma VII Governu Konstitusionál, ba períodu 2017 – 2022. Maibé destinu VII Governu labele hakat to’o tinan Lima, atu implementa sá planu no programa ne’ebé sira trasa ona iha compromisiu Polítika eleitorál nian. Ho razaun katak VII Governu ne’ebé ukun ho minoria no la hetan forsa Polítika iha parlamentu Nasionál nein hetan apoiu insidénsia parlamentár. Maski nune’e VII Governu minoria ne’ebé lidiradu husi Dr. Mari Alkatiri. Kontinua la’o tuir norma no legalidade ne’ebé konsagra iha KRDTL no kontinua mos la’o tuir nafatin devér Governu nian, hodi hakat ba parlamentu nasional no aprezenta Programa VII Governu nian, tuir enkudramentu legal ne’ebé iha, Maibé realidade hatudu seluk, katak iha momentu ne’ebá, tendénsia Polítika komesa manas liu tan. ne’ebé mai husi Bloku Opozisaun rasik, iha Parlamentu Nasionál hanesan bloku aliansa maioria parlamentár AMP (CNRT PLP no KHUNTO). Iha ne’ebé bloku apoiu VII Governu laiha forsa Polítika ne’ebé boot, nune’e mós la konvense Bloku AMP nu’udar opozisaun hodi vota a favor ba programa ne’ebe trasa husi VII Governu refere. Mezmu Programa hirak ne’e, hatu’ur ona iha Mata dalan Dezenvolvimentu Timor Leste nian ka Plano Estratejiku Dezenvolvimentu Nasionál (PEDN) maibé infelizmente opozisaun ne’ebé ho forsa boot ikus mais rezeita programa hirak ne’e, no hetan votu de rézesaun ka kontra, husi opozisaun no programa la konsege pasa.
Ho nune’e situasaun ne’e, mais afeta liu tan ezisténsia governu da VII nian, finálmente estadu Timor Leste konsege hamosu duni impase Polítika entre partidu polítiku ne’ebé asentu iha Parlamentu Nasionál 2017 nian. Impase Polítika refere dada to’o mai fulan 9 nia laran, Povu Maubere no Sosiedade Civil, Akademia, Relijiozu no Movimentu Estudante Universitáriu, sira mós preokupa ba kestaun impase Polítika rai laran tanba posibilidade Timor Leste bele hetan krize ekonomia, instituisional no seluk tan.
Hare ba situasaun ne’ebé povu Timor Leste preokupa, mak presidente nu’udar símbolu do estadu no Unidade Nasionál ou bele dehan aman ba estadu ka “father of state” konsege konvoka diálogu no apróxima lideransa Nasionál sira no liuliu ba lider partidu sira hodi solusiona lalais ba kestaun refere. Maibé laiha solusaun iha tempu ne’ebá no situasaun ne’e kontinua manas liu tan entre lider polítiku sira. (karik tanba altura ne’eba laiha prezensa lider istoriku hanesan Xanana Gusmão).
Tanba ne’e, Presidente Repúblika de Timor Leste Dr Francisco Guterres Lu – Olo, uza nia kompeténsia prerrogativa ne’ebé haktuir iha KRDTL Artigu 86 Alínea F nia redasaun. Hodi disolve Parlamentu Nasionál no dekreta Eleisaun Antesipada hodi fó fila poder estadu ba nia na’in (povu maubere) atu deside, tetu, no determina hikas ho dalan demokrasia, tanba povu de’it mak bele hakotu impase Polítika no povu duni mak sai na’in ba demokrasia.
Ho nune’e pella primeira vés, iha rejiaun Ázia no iha istória Timor nian ne’ebé mosu ho eleisaun antesipada. iha ne’ebé, Partidu ualu mak kompete iha eleisaun ne’ebé hala’o iha 12 de Maiu 2018.
No partidu kompete sira mak hanesan;
- PEP
- PD
- PR
- FRETILIN
- MSD
- MSM
- FDD
- AMP
Husi rezultadu eleisaun refere povu konsege fó fiar ba AMP maibé ho votu ne’e rohan alias manan maioria simples ho kadeira 34, no FRETILÍN iha 21 kadeira, PD, 5 kadeira no FDD 3 kadeira . Ho nune’e liga ba rezultadu husi eleisaun antesipada refere presidente da repúblika uza nia kompeténsia artigu 106 hodi halo nomiasaun ka indijita primeiru ministru tuir artigu ne’e deskrisaun iha númeru ida. Tanba ne’e povu Timor Leste nia governasaun foun mak hanaran VIII Governu Konstitusionál ne’ebé lidira husi S.Ex. Taur Matan Ruak. Maski governu ne’e hetan lejitima husi presidente repúblika maibé interese partidu polítiku kontínua nafatin sai impase Polítika. Lidun seluk, VIII Governu refere iha forsa Polítika ne’ebé boot iha parlamentu Nasionál maibé nia kompozisaun governu inkompletu. Hare husi ida ne’e, hakerek na’in tenta atu fó argumenta katak situasaun governu da hitu no da ualu kuaze atu hanesan. Relasiona ho estrutura governu ne’ebé ladauk kompletu bele afeta ba funsionamentu mákina do estadu nó mós Orsamentu jerál do estadu OJE.
Hafoin hakerek na’in observa no analiza ba situasaun sira ne’ebé konsidera hanesan dadus empires iha leten, so hatudu de’it karakter ka atitude imorál polítiku na’in sira nian. Ne’ebé povu fó fiar. Devia hanesan servidór ka ausiliár povu nian, tau hanoin lisuk ba povu nia moris di’ak. maibé sira so buka trata malu, buka ke’e malu ho modelu hukum karma. Husi atitude hirak ne’e la afavor ba povu nia esperansa. Hare ba realidade ne’ebé mak iha, karik Teoria Relasaun Internasionál realizmu ne’ebé haktuir husi T. Hobbes ne’e lo’os katak “normálmente insatisfasaun ne’e iha, tanba kauza husi indivíduu ka grupu nia egomania hodi afeta ba Interese Nasionál. situasaun sira ne’e, sempre akontese ba iha estadu poderozu no lider arrogante sira”(lia los teorria ne’e ezaminadu ona tanba realidade akontese iha Timor Leste).
Ho nune’e, mosu pergunta ida, Sera ke Timor Leste nu’udar País Poderozu ou Lider mak Arrogante? Atu resposta ba pergunta ne’e ho simples katak nasaun Timor Leste nu’udar país terseiru mundu ka lian Melayu negara dunia ketiga, ne’ebé hamriik apos de segunda Guerra mundiál ne’ebé moris iha Mileniu XXI, ho idade ida ne’ebé nurak liu kompara ho umanu. Los duni, reflete ba pergunta deskreve iha leten, Timor Leste país ida bele ki’ik, maibé nia lider polítiku mesak kanten ba podér no la kohi entende malu hodi ha sofre nafatin nia povu maubere rasik.
Realidade hatudu durante loron tolu hahú husi loron 25 – 27 fulan Jullu tinan 2018, ne’ebé hala’o diskusaun ka debate ba programa VIII Governu Konstitusionál nian, mesak nakonu ho tendénsia pratika Polítika emosionál (politika seim konsensia), entre bankada opozisaun no bankada proponente governu alias AMP. Situasaun refere hakerek na’in observa katak partidu polítiku sira iha parlamentu Nasionál, hala’o polítika ida ne’ebé mai ho “Hukum Karma” ka Frustrasaun ba Podér entre sira. ne’ebé hanesan reprezenta do povu, Finálmente laiha interese atu ko’alia ba povu nia moris diak. Maibe sira so oinsa atu taka idaidak nia argumentu hodi hetan lialos iha povu nia oin.
Parte seluk, enkuadra ba teoria husi Aristóteles hateten Polítika nu’udar maneira Polítika ne’ebé iha sentidu valor. se nune’e pergunta ba ita mak ne’e;
- Sa Polítika, mak elite Polítika sira defende ba povu nia interese enkuantu sira la konsege unidade.
- Sa maneira Polítika mak sira uza ba povu nia moris?
- Sa Polítika ne’ebé iha valor ba povu?
Husi pergunta ne’e leitór ida idak bele halo nia interpretasaun rasik. Tanba ne’e atu termina artigu refere, atu konklui katak husu ba lider Nasionál sira nafatin halo komunikasaun no diálogu hodi solusiona ba impase Polítika, hodi hadi’a ba povu nia moris, tanba povu hakarak iha estabilidade no povu hakarak povu iha nia governasaun ida ne’ebe diak ho boa governasaun.
Artigu ida ne’e la bazeia ba elementu diskriminativu ka assediu no defamasaun ruma, katak artigu ida ne’e hakerek bazeia ba konsagrasaun KRDTL artigu 40 no 41 kona ba liberdade koalia no informasaun ninian no liberdade emprensa ho komunikasaun social ninian.
Dili,28/07/2018
Hakerek na’in Luis Garcia
Editor Z-ray Ulhamousic
0 komentar :
Post a Comment
Komentariu lao ho Etika