"Wainhira Demokrasia ne'ebe iha nasaun RDTL hanesan deit formalidade ida, ho sentidu la akompaña ho diak tebes hosi partisipasaun povu nian, maka rezultadu ne'ebe ita hare sai hanesan Demokrasia Kriminozu Sira".
Pedasu ida hosi fraze ne'e hatudu signifikante ida katak Demokrasia hanesan palavra eh liafuan majika ida ne'ebe sempre mosu iha palku kampaña eleisaun wainhira eleisaun besik dadauk. Iha Fatin hotu-hotu ema grita no hakilar liafuan Demokrasia hanesan referensia ordenada ida ba padraun organizasional ne'ebe diak hosi Partidu Politiku sira.
Parte hotu-hotu kativadu ho ideia Demokrasia, iha ne'ebe soberania povu nian sai buat ida ne'ebe esaltadu hela ka husik hela. No ikus mai realidade hateten, demokrasia ne'ebe durante ne'e tane a'as nakfilak ho rolajen no laiha susessu. Povu nafatin sai ema ne'ebe sofre injustisa. " Faktu ida ne'e ita labele nega".
Signifika katak ne'e esplorasaun politika nain sira, portantu, ne'e elitu partidu politiku sira tantu mos kandidatu lejislativu sira, sira kompetidu tebes hodi hatudu sira nia forsa kapital hodi bele hetan potensia eleitor sira nian. Maibe iha parte seluk, sai kestaun bo'ot ida maka sira haluha sira nia edukasaun politika, konaba oinusa hetan forma diak ida hodi partisipa iha eleisaun. "Kestaun ida ne'e as-vezes sira husik hela".
Inpressionadu tebes, katak iha duni esplorasaun elitu partidu politiku nomos kandidatus sira hodi bele to'o iha tronu poder. La hanoin katak, movimentu politiku ne'ebe sira halo ne'e fo edukasaun politika ba povu ka lae.
injenuo tebes, komportamentu politika ba elitu sira ne'e, Sira kuaze lakon kontrolu wainhira hasoru kondisaun povu nian ne'ebe espera hela dadauk aumentasaun Bem-estar nian ka estabilidade nomos dezenvolvimentu ne'ebe substentavel. No ikus mai promessa demokrasia ne'ebe midar tebes grita no hakilar deit iha tempu eleisaun nian no lakon anin mamuk deit. Demokrasia so utiliza deit hanesan kilat ka arma kampeaun hodi embala povu sira.
Ema barak maka utiliza Demokrasia hodi hetan benefisiu ba sira nia a'an rasik. Evidensia sujere katak eleisaun sai induljensia politika nain sira hodi reba sira nia promessa Demokrasia, no lao tun sae vizita no halo dialogu ho povu sira, maibe eleisaun liu tiha no sira hetan tiha pode, vizilansia no dialogu mos para dadauk.
Valor demokrasia mout ba ema elitu sira nia bolsu tamba kauzada hosi partisipasaun povu iha festa demokrasia ne'ebe nakonu ho promessa falsu. Partidu politiku no elitu partisipantes eleisaun hotu-hotu sai fantose ka boneka ba politika foer hosi sira nia lideransa, ba sira ne'ebe iha fundu kapital ne'ebe bo'ot, ba kriminozu demokrasai sira, ba violador direitus umanus sira, ba koruptus sira, ba reformador kovarde no bosok ten sira, nomos ba aktivistas sira ne'ebe pramatiku no oportunistas sira.
Sistema eleisaun ne'ebe insufisiente no la demokratikamente, so fo deit oportunidade ba ema elitu ne'ebe iha fundu kapital bo'ot hodi bele kompete eleisaun, kestaun ida ne'e impede forsa alternativu ba ena ne'ebe ho fundu matenek deit maibe laiha fundu kapital, hanesan partidu ne'ebe osan bo'ot. No ikus mai sira tenke fa'an hotu sira nia rekursu moris hodi bele partisipa iha eleisaun maske sira nia pojisaun la hanesan partidu bo'ot sira. Reidade ne'e hatudu iha eleisaun 2012, ne'ebe konsege hakoi partidu ki'ik no nia emar sira, hanesan PSD ne'ebe nakonu ho potensia rekursus humanus maibe tenki namkari tamba nia partidu la hetan assesntu.
Eleisaun 2012, karik ita resikla fila fali, ne'e hanesan politika foer ba lejitimidade poder ida. Partidu politiku hotu-hotu fase liman hosi sira nia sala no ikus mai implemeta buat oin-oin ne'ebe lolos povu seidauk presija, hari'i ponte bobot, estrada bobot maibe nafatin sira nia kareta maka liu, povu kiak ba bebeik. Partisipador eleisaun ne'ebe envolve antes ne'e mos hanehan povu sira. No partidus politikus sira mos durante ne'e sei tende hodi konsentra ba nia interese partidu nomos importansia partidu nian no haluha interese komun ka povu nia esperansa tomak.
Tuir lolos, iha kondisaun no situasaun politika hanesan ne'e, reprezentante povu sira tenki haforsa ho kapasidade oin-oin konaba politika. Iha ne'ebe, liberdade, transparansia, no passu demokrasia sai ona parte determinate importante iha partidu politiku hodi bele luta iha unidade no estabilidade politika.
Signifika, Partidu Politiku tenki estabelese programa sira hanesan, halo enpoderamentu ba komunidade iha nivel lokal. Hodi nune'e bele hatudu momos katak, partidu politiku bele duni estabelese sira nia funsaun hodi halo fiskalzasaun iha area rural sira. Tamba kondisaun politika hirak ne'e bele hamosu politika orijente iha vida politika lokal sira. Ho nune'e partidu politiku sira tenki estabelese aprosimassaun oin-oin no lori povu hamutuk hodi hanoin oinusa atu lori roda governasaun no dezenvolvimentu iha area rural sira.
Atu aktualiza interese povu nia la hases a'an hosi servisu partidu polidu politiku sira, ho nune'e povu espera tebes buat barak hosi luta partidu politiku sira, tamba povu fiar katak partidu maka sei hodi nia ema ba iha parlamentu hodi sai povu nia reprezentate. No partidu politiku sira mos tenke halo buat ida ba povu iha tempu eleisaun, hodi nune'e bele foti povu nia fuan, maibe parte ne'e mos sempre faila tamba partidu politiku sira la fo komprensaun politika ne'ebe luas no diak ba povu sira, iha maka fundamentu politika historia, figura, no osan politika.
Povu konsideradu hanesan fatuk ne'ebe tenki nonok iha fatin waihira eleisaun hotu. Direitu politika povu valoriza deit ho sigaru folin, atraves ida ne'e mos iha politika foer ida ne'ebe halo povu senti buat hotu mida iha tempu eleisaun, liu ida ne'e maka sai moruk tiha fali.
injenuo tebes, komportamentu politika ba elitu sira ne'e, Sira so bele esploriza deit dever povu hanesan interese ida. Tuir lolos, prossesus politika nune'e labele akontese iha kada festa demokrasia, se karik elitu politiku sira hakarak duni hodi halo nia povu sai matenek hodi moris iha deokrasia ne'ebe diak, ita kestiona oituan, to'o ona iha ne'ebe, eleitor fo signifikante demokrasia.
Karik ida ne'e los, laiha sala karik ita karimbu eleisaun hanesan Demokrasia ema Kriminozu sira...!
Palavra hira ne'e hanesan deit pensamentu ka analizasaun ne'ebe hatudu katak, tuir lolos komportmentu elitu poliku sira, laiha mudansa ate agora. Rezultadu politika ne'ebe moris mai mos prossesu Demokrasia ba Kriminozu sira.
Atu harahun observasaun ba analizasaun ida ne'e, elitu partidu politiku sira, tenki muda sira nia komportamentu a'at ne'e, no tane as eleisaun hanesan momentu ne'ebe nabilan ha esperiensia hotu nomos puberniza Demorasia. Hahalok ida halo promessa falsu ne'ebe midar tenki husik, atu nune'e festa Demokrasai iha valor ba povu tomak.
"Opiniaun ida ne’e la bazeia ba elementu diskriminativu eh assediu no defarmasaun ruma, katak opiniaun ida ne’e bazeia ba konsagrasaun Kontituisaun RDTL Artigu 40 no 41 konaba Liberdade ko’alia no informasaun ninian ho Liberdade imprensa no komunikasaun sosiál ninian"
Muamalay ǁ Dili, 01,07,2017
0 komentar :
Post a Comment
Komentariu lao ho Etika