 |
| Prezidente Partidu CNRT, Xanana Gusmao |
Dili, 29 Juñu 2017
Durante komísiu polítika iha Munisipiu Liquica Sekretáriu Jerál Partidu FRETILIN Dr. Mari Alkatiri ba militante sira hateten katak vota ba FRETILIN atu nune’e jerasaun 74/75 manán hotu dala ida. Tanba ne’e Dr. Mari Alkatiri husu ba militante sira atu vota ba partidu, la’ós vota ba ema.
“FRETILIN manán, Xanana manán, FRETILIN lakon, Xanana lakon!” deklara Dr. Mari Alkatiri ba militante no apoiante sira partidu FRETILIN nian ne’ebé tuir kampaña iha munisipiu Liquica.
Relasiona ho deklarasaun polítika ida ne’e, Prezidente Partidu Conselho Recunstrucao Nacional Timorense (CNRT), Xanana Gusmao sente hakfodak. Tuir Xanana Gusmao partidu ida-idak halo nia kampaña ne’e duni la’ós partidu ida lakon depois ema seluk mós lakon hotu.
“FRETILIN lakon, Xanana lakon? Ha’u kaget para mate. FRETILIN halo nia kampaña, CNRT halo nia kampaña, halo nusa maka FRETILIN lakon, Xanana maka lakon fali?” Prezidente CNRT ne’e kestiona.
Tanba ne’e Prezidente Partidu CNRT husu ba públiku no liu-liu ba militantes no apoiantes CNRT nian atu mantén sira nia votu ba partidu CNRT hodi bele realiza programa partidu nian atu kontinua nafatin dezenvolvimentu sira ne’ebé la’o tiha ona.
Entretantu, relasiona ho deklarasaun polítika husi Sekretáriu Jerál Partidu FRETILIN Dr. Mari Alkatiri iha Postu Administrativu Hatolia katak povu nian mehi maka FRETILIN mehi tiha ona iha tinan 74/75, eis militante FRETILIN Jose Guterres kontra deklarasaun ida ne’e.
Tuir Jose Guterres katak nudár jerasaun ida ne’ebé halai ba ai-laran iha funu 74/75 nia fó duni ninia konfiansa tomak ba Partidu FRETILIN iha tinan 2001 hodi lori Partidu FRETILIN manán maioria absoluta. Maibe iha tinan 2007 Jose Guterres deside atu fó ninia votu ba Partidu CNRT tanba krize 2006 halakon povu nia mehi.
“FRETILIN kaer governu iha 2006 hamosu krize hodi la konsege kaer ha’u nia inan aman sira nia mehi, tanba ne’e maka iha 2007 bainhira CNRT mosu hodi hakotu krize no hatudu dalan hodi kaer didi’ak ha’u nia inan aman sira nia mehi, ha’u nia mehi, ne’e maka ha’u tama kedas CNRT iha 2007 to’o agora.” Jose Guterres salienta.
Tuir oráriu, hafoin kampaña polítika iha Munisipiu Liquica Partidu CNRT sei deskansa antes hala’o fali komísiu polítika iha Remexio iha loron 30 Juñu 2017.
0 komentar :
Post a Comment
Komentariu lao ho Etika