 |
| Lideransa Orgaun Estadu nian inaugura aeroportu Suai. |
Durante kampaña polítika iha Munisípiu Covalima Sekretáriu Jerál Partidu FRETILIN kestiona Governu ne’ebé lidera husi Partidu CNRT nia planu dezenvolvimentu. Tuir Sekretáriu Jerál Partidu FRETILIN tuir loloos Governu labele halo aeroportu boboot iha Munisipiu Covalima enkuantu infrastrutura sira seluk seidauk harii.
Relasiona ho konteúdu ka matéria kampaña ne’ebé Partidu FRETILIN hili hodi ataka governu ne’ebé lidera husi Partidu CNRT ne’e, Prezidente Partidu CNRT Xanana Gusmao hateten katak Dr. Mari Alkatiri parese la gosta aeroportu ne’e tanba aeroportu ne’e tau nia (red-Xanana) naran.
“Kok, ZEEMS nia aeroportu ne’e bot liu fali Suai nia aeroportu? Keta tanba tau fali ‘Kay Rala Xanana Gusmao’ nia naran ne’e karik?” Prezidente Partidu CNRT ne’e kestiona.
Hafoin hateke sa’e ba leten, Eis Primeiru Ministru ne’e hatutan: “La buat ida, OECUSSE nian ne’e tau netik ‘CAMARADA DR. MARI ALKATIRI’ nia aeroportu.”
Aliende kestiona kona-ba aeroportu Suai, durante komísiu polítiku iha Postu Administrativu Hatolia no Munisipiu Ainaro, Sekretáriu Jerál Partidu FRETILIN Dr. Mari Alkatiri mós kestiona kona-ba implementasaun lian materna iha sistema edukasaun Timor-Leste nian ne’ebé impede dezenvolvimentu edukasaun iha Timor-Leste.
Tuir Dr. Mari Alkatiri nia komísiu iha Munisipiu Ainaro hateten: “Sala kuandu ita dehan ho lian materna labarik sira aprende lalais liu, sim aprende lee, hakerek no halo konta, maibé kuandu sira ba 6o sira ba estuda fali lian seluk sira la hatene, ne’e sistema maka sala.”
Hatán ba Dr. Mari Alkatiri nia deklarasaun polítika ne’e Prezidente Partidu CNRT hateten katak lian materna ne’e fasilita liu labarik sira atu hatene lee hodi komprende ho di’ak lian no sasán no konta ho di’ak nune’e bainhira aprende ho lian tetun ka portugés sira bele komesa di’ak liután.
“Kamarada Dr. Mari Alkatiri uluk hela vinte quatro anos iha Mosambike, iha Mosambike mós governu implementa lian materna, tanba uza lian materna ba labarik ki’ik sira ne’e hanesan ponte ida atu loke sira nia neon hodi komprende didi’ak liafuan ho sasán no hakerek.” Tenik Prezidente CNRT Xanana Gusmao.
Tuir Ministru Planeamentu no Investimentu Estratéjiku ne’e katak hafoin uza lian materna hodi labarik sira komprende didi’ak sasán sei fasil liu bainhira sira aprende lian portugés labarik sira bele lee didi’ak portugés hodi liga ho sasán.
Entretantu mídia ida ne’e observa katak maske Partidu CNRT konvida Partidu FRETILIN hodi involve iha governasaun maibé durante periodu kampaña ne’e aléinde hato’o programa partidu nian, Partidu FRETILIN mós buka celah atu bele ataka programa Governu nian.
PLT/DILI
0 komentar :
Post a Comment
Komentariu lao ho Etika