 |
| Membru CCF Dr. Rui Araujo halo komisiu politiku. |
Dili, 26 Juñu 2017
Durante komísiu polítiku iha Munisipiu Bobonaro, Dr. Rui Maria Araujo hato’o ba militante no simpatizante Partidu FRETILIN nian katak Timor-Leste ukun an ona iha tinan 15 hodi kaer rasik kuda talin. Mezmu nune’e FRETILIN kaer kuda tali iha tinan lima nia laran de’it no ikus mai tali ne’e ema seluk (red-CNRT) maka dada tiha fali hodi dada tun dada sa’e no hamosu fukun barak.
“Kamarada sira, kuda tali ne’e ema seluk maka dada tiha depois dada tun dada sa’e to’o hamosu fukun barak, bainhira mosu fukun barak ona entaun ita tenke kore fukun ne’e. Fukun ne’e so FRETILIN maka bele kore.” Dr. Rui Maria Araujo deklara ba masa FRETILIN ne’ebé simu ho entuziazmu hodi haklalak.
Responde ba deklarasaun polítika ida ne’e, Prezidente Partidu CNRT Xanana Gusmao konsidera deklarasaun Dr. Rui Araujo nian kontradís ho realidade.
“Dr. Rui Araujo parese haluha tiha ona tanba sa maka CNRT mosu fali iha 2007? Simples de’it, CNRT mosu hodi kore fukun sira ne’ebé kamarada sira bobar metin tun sa’e.” responde Xanana Gusmao.
Prezidente CNRT ne’ebé mós nudár eis Primeiru Ministru ne’e lamenta tanba iha ona 2017 maibé kamarada sira nafatin halimar ho liafuan FRETILIN maka katuas no so katuas maka bele kore tali fukun para bele atinje objetivu.
“Iha inaugurasaun monumentu Sr. Xavier do Amaral, katuas ne’ebé ita refere (FRETILIN) dehan nune’e, nia (Xanana) la’ós ona FRETILIN, nia tama FRETILIN hodi muda polítika rezisténsia nian atu kaer funu, nia sai tiha ona husi FRETILIN. Ne’ebé, CNRT ida be funu nian kore tali fukun ne’e mai husi kedas CNRM” Xanana hatutan.
Iha biban ida ne’e Prezidente Partidu CNRT ne’e mós liga uitoan deklarasaun polítika kuadru FRETILN sira nian iha kampaña eleisaun parlamentár ne’ebé hateten katak tanba CNRT la iha kapasidade atu ukun maka entrega pasta Primeiru Ministru no Ministru nian ba kamarada sira iha FRETILIN.
“Tanba atu tane as interese nasionál maka ita buka atu halibur partidu sira hotu ne’ebé hetan asentu iha Parlamentu Nasionál atu hamutuk defende soberania nasionál. Ida ne’e ha’u hato’o kedas iha enserramentu konferénsia munisipál partidu nian iha Ermera iha 2015, la’ós tanba CNRT la mampu.” Xanana Gusmao haktuir.
Entretantu hafoin hare ba evolusaun no animo povu nian ba Partidu CNRT iha semana dahuluk kampaña polítika ba eleisaun parlamentár Prezidente CNRT Xanana Gusmao la hanoin atu bolu ema husi li’ur atu involve no lidera fali governasaun.
“Iha konferénsia FRETILIN iha 2000 iha GMT katuas ida naran Kay Rala Xanana Gusmao deklara katak nia sai tiha ona husi FRETILIN, ne’ebe tidak mungkin katuas ne’e ba hamutuk fali ho FRETILN atu kore fukun sira ne’ebe Dr. Rui Araujo temi.” Xanana Gusmao deklara hodi remata ninia liafuan.
Ohin, loron 26 Juñu 2017, Partidu CNRT hala’o kampaña polítika iha Munisipiu Ermera hodi kontinua aprezenta programa no polítika partidu nian ba iha militante no apoiante sira iha munisipiu refere.
Le Mos: Ami la tabele ba maun XANANA, ami apoiu maun XANANA!
0 komentar :
Post a Comment
Komentariu lao ho Etika