Lista Misaun ONU ne'ebe serbí Timor Leste dezde 1999 to’o 2012 || REFERENSIA ESTUDU

Funsaun Misaun ONU iha Timor Leste, hanesan misaun seguransa paz ne'ebe kria hosi Konsellu seguransa ONU, nebe kria iha Loron 11 fulan  Juñu tinan 1999, liu hosi rezolusaun 1246, atu realiza referendu Timor leste hodi desidi futuru nasaun refere ho alternativu tolu maka hanesan; Autonomia espesial, integrasaun ho Indonesia, nomos separasaun ka livre hosi indonesia.

Kronolojia
Misaun ONU lima serbí Timor-Leste dezde 1999 to’o 2012

UNAMET
Misaun Asisténsia Nasoins Unidas nian iha Timor Leste ne'ebe hahu no finaliza missaun iha fulan Juñu tinan 1999 – fulan Outubru tinan 1999.

ONU nia Konsellu Seguransa estabelese Misaun Asisténsia Nasoins Unidas nian iha Timor Leste hodi hala’o Konsulta Populár iha 1999, nune’e fó biban ba povu Timor Leste nia autodeterminasaun. Konsellu Seguransa autoriza Forsa Internasionál iha Timor Leste (INTERFET) hodi restaura lei no orden bainhira violénsia barak akontese liutiha Konsulta Populár.

• Iha Konsulta Populár iha 30 Agostu 1999, maioria boboot ho porsentu 78,5 husi votante timoroan sira rejeita autonomia espesiál iha Indonézia nia laran ne’ebé propoin, no loke dalan ba independénsia totál.

• Kampaña sunu no terrór nian sobu maioria husi infraestrutura iha Timor-Leste, no ema rihun barak halai husi sira-nia uma ka tenke bá Timór Loromonu tanba obrigasaun.

Misaun ne'e lidera hosi Ian Martin 
Reprezentante Espesiál Sekretáriu-Jerál nian

UNTAET

Administrasaun Tranzitória Nasoins Unidas nian iha Timor Leste ne'ebe hahu no finaliza missaun iha fulan Outubru tinan 1999 –  fulan Maiu tinan 2002

ONU nia Konsellu Seguransa estabelese Administrasaun Tranzitória Nasoins Unidas nian iha Timor Leste hodi administra tranzisaun to’o independénsia totál. Ninia mandatu inklui autoridade tomak lejizlativa, ezekutiva no judisiál atu administra nasaun ne’e. ONU apoia programa oioin hodi tau matan ba destruisaun maka’as infraestrutura nian no ba ema ne’ebé sai dezlokadu durante violénsia ne’ebé akontese depoizde Konsulta Populár.

• Ema husi Timor-Leste liu 110.000 fila fali mai husi kampu-refujiadu iha Timór Loromonu até Dezembru 1999

• Konsellu Konsultivu Nasionál forma iha Dezembru 1999 hodi garante katak Timor oan sira envolve diretamente iha prosesu foti desizaun iha UNTAET

• Operasaun militár nia komandu transfere husi INTERFET ba Forsa Manutensaun Pás Nasoins Unidas nian iha Fevereiru 2000

• Povu Timor-Leste nian hili Asembleia Konstituinte ho membru na'in-88 iha Agostu 2001 atu hakerek Konstituisaun nasionál

• Asembleia Konstituinte asina Timor-Leste nia Konstituisaun iha 22 Marsu 2002

• Timor-Leste hala'o Eleisaun Prezidensiál ba dala uluk iha Abríl 2002

• Repúblika Demokrátika Timor-Leste sai Estadu soberanu foun dahuluk iha miléniu ne'e iha 20 Maiu 2002; Kay Rala Xanana Gusmão maka Prezidente, no Mari Alkatiri maka Primeiru Ministru

Misaun ne'e Lidera hosi Sergio Vieira de Mello
Reprezentante Espesiál Sekretáriu-Jerál nian no Administradór Tranzitóriu

UNMISET

Misaun Apoiu husi Nasoins Unidas iha Timor Leste ne'ebe hahu no finaliza missaun iha fulan Maiu tinan 2002 – Fulan Maiu Tinan 2005

ONU nia Konsellu Seguransa estabelese Misaun Apoiu husi Nasoins Unidas iha Timor Leste hodi fó apoiu ba nasaun ne’ebé foin independente ne'e.

• Timor Leste sai nu'udar Estadu-membru númeru 191 Nasoins Unidas nian iha 27 Setembru 2002

• Timor Leste toma responsabilidade tomak ba polisiamentu no seguransa esterna iha 20 Maiu 2004

• ONU retira ninia pesoál manutensaun pás nian

Misaun ne'e Lidera hosi Kamalesh Sharma

Reprezentante Espesiál Sekretáriu-Jerál nian

UNOTIL

Eskritóriu ONU nian iha Timor Leste ne'ebe hahu no finaliza missaun iha fulan Maiu tinan 2005 – Fulan Agostu Tinan 2006

ONU nia Konsellu Seguransa estabelese Eskritóriu Nasoins Unidas nian iha Timor Leste, nu’udar misaun polítika ida, hodi apoia dezenvolvimentu nafatin instituisaun nasionál sira no forsa polísia nian, no mós promove demokrasia no direitus umanus.

• Tuir estimativa husi Timor Leste nia Komisaun Simu-malu, Lia-loos no Rekonsiliasaun (CAVR) iha ninia relatóriu iha Dezembru 2005 ho naran Chega! (To'o ona!), pelumenus ema na'in-102.800 mate tanba konflitu dezde 1975 to'o 1999

• Protestu relasiona ho demisaun ba soldadu sira hamosu violénsia entre tropa no polísia iha Abríl no Maiu 2006 iha kapitál Dili

• Liu ema na'in-100.000 sai dezlokadu durante situasaun runguranga ne'ebé tuirmai

• Austrália lidera forsa internasionál ida atu restaura lei no orden hodi hatán ba pedidu husi Governu Timor Leste nian

Misaun ne'e Lidera hosi Sukehiro Hasegawa
Reprezentante Espesiál Sekretáriu-Jerál nian

UNMIT

Misaun Integrada Nasoins Unidas nian iha Timor Leste hahu no finaliza missaun iha fulan Agostu tinan 2006 – fulan Dezembru tinan 2012

ONU nia Konsellu Seguransa estabelese Misaun Integrada Nasoins Unidas nian iha Timor Leste depoizde violénsia rebenta. Misaun ne’e iha mandatu abranjente hodi tulun Timor Leste atu tau matan ba konsekuénsia no kauza fundamentál konflitu nian. UNMIT tulun Timor-Leste hodi hametin estabilidade, haburas demokrasia, promove direitus umanus, fó formasaun ba polísia, hametin sistema justisa no hadi’ak supervizaun sivíl ba forsa seguransa sira. Bainhira hahú, responsabilidade polisiamentu iha UNMIT nia liman.

• Timor Leste hala’o eleisaun prezidensiál no parlamentár iha 2007 ho apoiu husi UNMIT

• Timor Leste taka kampu ikus ema dezlokadu internu sira-nian iha 16 Juñu 2009

• UNMIT entrega responsabilidade atu hala’o, komanda no kontrola operasaun polísia nian ba Polísia Nasionál Timor-Leste iha 27 Marsu 2011

• Timor-Leste hala’o eleisaun prezidensiál iha Marsu no Abríl 2012

• Timor-Leste selebra aniversáriu Restaurasaun Independénsia ba dala sanulu iha 20 Maiu 2012 no Taur Matan Ruak hola pose nu’udar Prezidente

• Timor-Leste hala’o eleisaun parlamentár iha 7 Jullu 2012

• Timor-Leste nia Parlamentu datoluk hola pose iha 8 Agostu 2012

• Kay Rala Xanana Gusmão asume filafali papél Primeiru Ministru iha 8 Agostu 2012

• UNMIT prepara atu arranka sai to’o 31 Dezembru 2012

Misaun ne'e Lidera hosi Atul Khare

Reprezentante Espesiál Sekretáriu Jerál nian, Dezembru 2006–Dezembru 2009

Ameerah Haq

Reprezentante Espesiál Sekretáriu Jerál nian, Janeiru 2010–Juñu 2012

Finn Reske-Nielsen

Reprezentante Espesiál Interinu Sekretáriu-Jerál nian, Juñu 2012–Dezembru 2012

Ulhamousic/Dili/2017

Le Mos: Sistema Governasaun Timor-Leste

Share to Google Plus

About Lospalos News

Lospalos News hanesan media ida ne'ebe eziste hosi ema Lospalos atu transmite informasaun sosial ba publiku no laiha interese ba kualker aspeitu ne'ebe iha relasaun ho osan. informasaun ne'ebe Lospalos News publika mai hosi fontes barak, ho intensaun atu publika tutan ba ema hotu ne'ebe presiza.