 |
| Lideransa FRETILIN iha inaugurasaun ponte Noefefan. |
Iha tinan tolu nia laran projetu Zona Ekonomia Eskluzivu Ekonomia Sosiál no Merkadu (ZEEMS) gasta ona osan hamutuk $500 millaun resin ho intensaun atu harii zona ekonomia ida ne’ebé sustentável no benefisia povu Oecusse em partikulár no Timor-Leste em jerál.
ZEEMS ne’e lidera husi Sekretáriu Jerál Partidu FRETILIN Dr. Mari Alkatiri ne’ebé to’o oras ne’e hahú ona investimentu iha infrastrutura báziku hanesan estrada, ponte, portu, no aeroportu, no rede enerjia eletrisidade. Tuir observasaun mídia ida ne’e nian iha tinan ida ne’e projetu ne’ebé inaugura ona maka ponte Noefefan, no irrigasaun mota Tono.
Mezmu nune’e tuir observasaun husi kuadru Partidu Demokrátiku (PD) ne’ebé prefere sai anónimu hateten katak konseitu ZEEMS ne’e la’ós konseitu ida ne’ebé sustentável.
“Dr. Mari Alkatiri dala ruma gava an dehan ZEEMS ne’e maka modelu dezenvolvimentu ne’ebé atu implementa iha munisipiu seluk maibé Dr. Mari haluha tiha katak modelu investimentu ZEEMS ne’e la sustentável.” Fontes husi PD ne’e haktuir ba mídia ida ne’e.
Bainhira mídia ida ne’e husu tanba sá maka tuir ninia hanoin katak ZEEMS ne’e la’ós konseitu dezenvolvimentu ne’ebé sustentável nia hatán katak bainhira ita ko’alia sustentabilidade signifika katak investimentu ne’ebé ita halo tenke iha fali retornu atu bele kontinua sustenta projetu sira ne’ebé ita investe ba.
“ZEEMS ne’e atu hetan retornu husi ne’ebé? Turizmu? Turizmu ita sei labele kompete ho nasaun sira hanesan Tailándia, Singapura, no Indonézia (Bali) tanba sira oferese servisu ne’ebé di’ak liu no baratu kompara ho Timor-Leste (ZEEMS).” Responde husi kuadru Partidu Demokrátiku ne’ebé nia naran tama mós iha lista ba Membru Parlamentu ba periodu 2017-2022.
Kandidatu Membru Parlamentu ne’e hatutan: “Karik opsaun ida maka loke casino iha ZEEMS, maibé oras ne’e Xina mós halo investimentu agresivu iha setór ida ne’e to’o ate Macau mós sofre husi aproximasaun agresivu ne’ebé Xina halo em termu de indústria jogus nian ida ne’e.”
Kandidatu ne’ebé ho background akadémiku iha area ekonomia ne’e hateten katak Governu fó liberdade ba autoridade ZEEMS atu define polítika ekonómika maibé to’o agora autoridade ZEEMS seidauk define polítika ida ne’e maibé foku liu ba dezenvolvimentu fíziku hanesan infrastrutura atu hatudu de’it ba públiku nudár instrumentu ba benefísiu polítika.
Entretantu husi Partidu FRETILIN fiar katak modelu dezenvolvimentu ida ne’e maka di’ak liu no sei implementa iha munisipiu sira seluk bainhira FRETILIN manán iha eleisaun parlamentár tinan ida ne’e.
0 komentar :
Post a Comment
Komentariu lao ho Etika