 |
| Prezidente Partidu CNRT Xanana Gusmao |
Relasiona ho deklarasaun Sekretáriu Jerál no Prezidente Partidu FRETILIN, Dr. Mari Alkatiri iha mídia kona-ba Governasaun Aliansa Maioria Parlamentár no Bloku Koligasaun ne’ebé lidera husi Partidu CNRT hamosu tusan ratusan juta, Prezidente Partidua CNRT Xanana Gusmao husu ba Dr. Mari Alkatiri atu labele ko’alia arbiru.
“Kamarada Dr. Mari Alkatiri dala ruma la hatene, iha CNRT nia Governasaun maka hanoin atu Investe iha Fundo Petrolíferu iha tinan 2011 ne’ebé ita bele hare ninia osan to’o ohin loron sa’e ba $3.6 Billioens.” Xanana Gusmao deklara.
Tuir Prezidente Partidu CNRT ne’e osan husi investimentu fundus petrolíferu ne’e maka sei selu fali ba tusan ne’ebé oras ne’e governu foti.
Xanana Gusmao hatutan: “Hodi osan husi investimentu ne’e maka ita sei selu tusan ne’e duni sei la fó todan ka da’et ba ita nia oan no bei-oan sira. Se ita hasai osan husi fundus maka sei hamenus osan iha fundus. Tanba ne'e maka kuandu atu ko’alia sasán presiza iha koñesimentu kle’an ba asuntu, do que ko’alia barak ema dehan ita ko’alia arbiru.”
Iha oportunidade ida ne’e Prezidente Partidu CNRT aproveita atu ko’alia mós kona-ba dividas naun finanseiras. Tuir Xanana Gusmao ida ne’e hanesan dívida ne’ebé emprezáriu sira halo servisu la la’o, governu dudu maka la ba, entaun sobu tiha maka halo fali, situasaun sira hanesan ne’e maka kria dividas finanseira.
Xanana salienta: “Se ita hakarak tender ba sasán ki’ik no bot hotu, ita bele, maibé ita la dudu ita nia setór privadu. Iha konstrusaun nasaun, la’ós de’it estadu maibé presiza mós ita nia setór privadu sira.”
Tuir eis Primeiru Ministru ne’e katak setór privadu Timor-Leste nian sei fraku tanba ne’e maka tenke iha vizaun ida hodi dudu sira atu hadi’ak sira nia mentalidade nune’e bele komprende sira nia papél no partisipasaun loloos iha dezenvolvimentu rai ida ne’e nian.
“Mudansa de mentalidade ho mudansa hahalok ne’e sempre lori tempu, tanba ida ne’e mós ita koalia kona-ba konstrusaun estadu, estadu ne’ebé foin iha tinan sanulu resin lima.” Xanana Gusmao hateten hodi taka ninia deklarasaun.
Observasaun husi mídia ida ne’e hatudu katak Partidu FRETILIN aléinde uza ZEEMS nudár matéria kampaña prinsipál, oradór sira mós uza kestaun sira hanesan tusan ne’ebé governu foti nudár tópiku atu dada apoiu no manán votu husi públiku.
0 komentar :
Post a Comment
Komentariu lao ho Etika