 |
| Sekretariu Jeral FRETILIN, Dr. Mari Alkatiri |
Ainaro, 25 Juñu 2017
Durante komísiu polítika iha Munisipiu Bobonaro no Ermera, Sekretáriu Jerál Partidu FRETILIN Dr. Mari Alkatiri husu ba militante sira atu labele monu ba partidu ne’ebé lori osan atu sosa povu nia votu. Tuir Dr. Mari Alkatiri katak iha tempu kampaña partidu balun lori osan maka sosa povu nia votu hodi manán iha eleisaun.
“Ha’u apela ba lideransa partidu nian atu lori programa ba povu, la’ós lori osan hodi sosa povu nia votu (red-CNRT). Ha’u apela ba lider partidu atu labele promete konflitu para atu hetan kadeira (red-PLP).”
Bazeia ba observasaun mídia ida ne’e Partidu FRETILIN iha komísiu polítika akuza partidu CNRT lori osan sosa votu no mós lansa propaganda iha mídia sosiál ho matéria ne’ebé hanesan. Iha eleisaun 2012 Partidu FRETILIN kondena komputadór STAE nian no pratika money politic maka halakon FRETILIN iha eleisaun.
Aléinde fa’an susesu ZEEMS nudár matéria prinsipál iha kampaña eleisaun parlamentár periodu ida ne’e, Partidu FRETILIN kontinua lansa propaganda pratika money politic ba komunidade atu hetan konfiansa iha eleisaun ida ne’e.
Relasiona ho akuzasaun money politic ne’ebé dirije ba Partidu CNRT, Prezidente Partidu CNRT Xanana Gusmao deklara katak povu Maubere ne’e matenek ona no la beik hanesan iha tinan 1974 tanba ne’e labele lansa propaganda sira hanesan ne’e.
“Kamarada Dr. Mari Alkatiri tanba hela barak liu iha rai li’ur be la hatene povu nia matenek. Hahú kedas iha Eleisaun Parlamentár 2012, ki’ik ka bot kamarada sempre dehan de’it money politic, ida ne’e so para atu taka kesalahan-kesalahan sira.” Xanana Gusmao responde.
Entretantu kuadru distritál CNRT Jose Manuel Araujo husu atu partidu hotu-hotu labele halo akuzasaun falsu, enkuantu iha provas ruma bele relata ba CNE la’ós soe iha públiku atu kria konfuzaun.
Jose Manuel Araujo haktuir: “Bainhira tempu eleisaun ona FRETILIN sempre akuza CNRT fahe osan maibé nunka iha realidade, nunka iha evidénsia, ne’ebé di’ak lalika kontinua propaganda baratu ida ne’e.”
Jose Manuel Araujo fiar an katak Partidu CNRT sei manán iha Munisipiu Ainaro iha eleisaun parlamentár ne’ebé sei hala’o iha loron 22 Jullu 2017. Tuir oráriu kampaña nian, Partidu CNRT sei halo kampaña iha Munisipiu Aileu iha loron 25 Juñu 2017.
0 komentar :
Post a Comment
Komentariu lao ho Etika