 |
| Timor-Leste nia veteranu funu nain sira. |
Iha kampaña ba eleisaun parlamentár ne’ebé hala’o iha Munisipiu Manufahi, Prezidente Partidu Libertasaun Popular Taur Matan Ruak deklara katak ema barak maka oras ne’e tabele ba Maun Xanana atu hetan oportunidade.
“Ha’u Maun Xanana nia wakil iha ai laran durante tinan 17, tanba ne’e ha’u koñese Maun Xanana di’ak liu sira hotu, inklui ministru sira” Taur Matan Ruak deklara ba apoiante sira PLP nian ne’ebé partisipa iha komísiu polítika refere.
Taur hatutan dehan: “Sira barak maka oras ne’e tabele Maun Xanana atu buka oportunidade, no ha’u koñese di’ak sira hotu!”
Relasiona ho deklarasaun ida ne’e, veteranu ida ne’ebé oras ne’e tama iha kuadru Partidu CNRT nian rejeita no hateten katak sira nia prezensa iha CNRT la’ós atu tabele Maun Bot Xanana maibé atu fó apoiu ba Maun Bot.
“Ha’u pesoalmente respeitu tebes pozisaun polítika Maun Taur nian, maibé dehan fali ami sira hotu ne’ebé hamutuk ho Maun Xanana ne’e tabele atu buka oportunidade ne’e maka la los” haktuir veteranu ne’ebé husu atu lalika temi nia naran.
Veteranu ne’e kontinua: “Ami lamenta tebes tanba de’it diferensa polítika, Maun Taur konsidera ami veteranu sira, eis klandestina sira ne’ebé oras ne’e hamutuk iha CNRT tabele Maun Xanana atu buka oportunidade.”
Ikus liu tuir veteranu ne’e nia hanoin Timor-Leste ukun an no presiza ema hotu nia kontribuisaun atu hadi’ak rai ida ne’e ba oin. Tanba ne’e bainhira CNRT manán sei kontinua halibur Timoroan sira ne’ebé iha kapasidade atu buka rezolve problema ne’ebé povu enfrenta.
Ohin Partidu CNRT hala’o kampaña iha Munisipiu Ailue no hetan partisipasaun másimu husi militante no apoiante sira partidu nian. Tuir observasaun mídia ida ne’e nian, hare ba númeru partisipante iha kampaña ba loron ida ne’e nian iha posibilidade bot partidu CNRT sei manán tan iha munisipiu Aileu hanesan iha tinan lima liubá.
0 komentar :
Post a Comment
Komentariu lao ho Etika