TATTO NO MOVIMENTU FEMINISTA IHA PERSPETIVA ARTE NO KULTURA SOSIEDADE TIMOR-LESTE

 

TATTO NO MOVIMENTU FEMINISTA IHA PERSPETIVA ARTE NO KULTURA SOSIEDADE TIMOR-LESTE

Argelio B. Vilela “Z-ray Vilela”

Sosiedade Timor-Leste nu’udar sosiedade kulta ne’ebé vizivel too ohin loron ho nia perspetiva ne’ebé sempre konsentra ba tradisaun, kultura no kostume antiga. Perspetiva ida ne’e influénsia tebes ba ezisténsia tatto inklui konsiderasaun ba igualdade jéneru. Tatto sempre asosiadu ho kriminalidade, tanba ema lubuk balun ne’ebé utiliza tatto iha nia isin hanesan simbolu korajen ida hodi partisipa iha aktu krime, no media massa mos ábitua ho hatudu tatto ne’ebé iha ema nia isin hanesan indikadór baihira ema ruma partisipa iha krime ruma no/ka bainhira ema refere akuzadu hanesan suspeitu ba krime ruma. Kestaun ida ne’e indiretamente kondisioná sosiedade Timor-Leste hodi nafatin interliga tatto ho kriminalidade. Enkuantu konsiderasaun ba igualdade jéneru, kuadradu Feto hare hanesan objetu komplementár ba nesesidade biolójika no nesesidade parseiru ba mane tanba dominasaun sosiedade patriarkal ne’ebé hatur-saé Mane nia pozisaun boot no aas-liu Feto, hahalok ida ne’e sei sai nafatin kostume ida ne’ebé konsidera hanesan tradisaun ne’ebé labele muda. Iha parte seluk, pontu de vista publiku kona-ba tatto iha sosiedade Timor-Leste diferensializa iha sexo, entre mane ne’ebé iha tatto no feto ne’ebé iha tatto. Mane tatto, ne’e kriminozu, Feto tatto,  ne’e Puta / Feto ne’ebé moris ho atividade sex komersial. Hare ba exposto sira ne’e artigu ida ne’e mai ho argumentu krítiku utiliza abordagem akademiku ho hanoin atu halo konxiensializasaun no hatur identidade hafurak-isin hanesan estetika ida, hodi nune’e bele prova katak, saida mak sosiedade hanoin kona-ba estereótipu ne’ebé negativu hasoru ema ne’ebé iha tatto, neineik sei rahun no/ka tohar, inklui saida mak sosiedade deside kona-ba kuadradu Feto tuir perspetiva patriarkal sei mout no lakon. Prova hodi halakon perspetiva sosiedade kulta ne’ebé vizivel no klásika liu hare ba tatto no kuadradu feto mak, hatur tatto nu'udar arte ne’ebé foti isin-lolon hanesan media espresaun, no hatur feto hanesan parseiru igual ne’ebé hanesan ho mane hodi bele hetan espasu iha liña frente.

Perspetiva Sosiedade Timor-Leste kona-ba Arte

Iha moris sosiedade, Arte nu’udar kestaun ne’ebé interesante liu hodi bele vinkula ema ba iha espresaun ida no hafurak sosiedade ida nia moris, tanba arte mak espresaun espíritu ne’ebé furak liu. Universalmente iha pensamentu kona-ba arte hanesan obra, koñesidu nu’udar simbólika, Metafórika, Manipulasaun objetu, Auto-espresaun, inklui impresaun no mensajen lubuk ida. Konteúdu ida ne’e hotu nu’udar deskrisaun kona-ba realidade no vizaun mundu ne’ebé aprezenta mai hanesan obra ida.

Iha kontestu Timor-Leste, Arte hatur hanesan espresaun espíritu ne’ebé hatudu identidade kultural no moris ema nian hodi bele dignifika nia valor kultural, hanesan identidade lisan, identidade knua, antesedénsia tradisaun no istória antiguidade tradisaun, kultura no kostume. Arte iha Timor-Leste espresa liuhusi hamulak ka ko’alia, kanta, dezeñu, eskultura-ai, eskultura-fatuk. Espresaun arte utiliza isin-lolon ema-nian hanesan instrumentu iha era primordial seidauk eziste, hafoin akontese iha Erra istória Timor-Leste bainhira Kolonizasaun Portugeza too ona iha Timo-Leste too okupasaun japoneza, no invazaun indonézia. Ho nune’e, iha sosiedade Timor-Leste nia hare, Espresaun arte utiliza isin-lolon ema-nian hanesan tatto (Caci, iha lian Fataluku) nu’udar injesaun eransa  kultural kolonial mezmu istorikamente iha rai-seluk utiliza nanis ona iha 3000 Ac. Iha mesir antiga, tuir mai husi ema Polinesia, Filipina, Kalimantan, Afrika, Norte Amerika, Amerika Sul, Mesoamerika, Europa, Japaun, Kamboja, inklui Tionghoa, no too mai iha Timor iha Tempu okupasaun Japaun, Feto Timor utiliza hodi livre husi, sai-atan seksual ba Militar Japaun.

Arte bazikamente la’ós produtu produsaun no reprodusaun natural, maibé husi obra ema nian, entaun arte iha poténsia artifisial. Arte ho nia kapasidade la natural ho sentidu kria no destina ba ema ho nia moris. Ho nune’e arte hanesan algu artifisial ho sentidu la’ós rezultadu prosesu natural maski nia material produsaun mai husi rai. Ida ne’e hatudu referénsia di’ak ida ba sosiedade Timor-Leste atu konsidera tatto hanesan Espresaun arte ne’ebé  utiliza isin-lolon ema-nian nu’udar instrumentu atu espresa nia espíritu, espresaun ida ne’e hatudu poténsia artifisial husi mudansa no evolusaun ema Timor hodi bele dignifika nia valor kultural, hanesan identidade lisan, identidade knua, antesedénsia tradisaun no istória antiguidade tradisaun, kultura no kostume la’ós ona liu husi hamulak ka ko’alia, kanta, dezeñu, eskultura-ai, eskultura-fatuk de’it maibé liu husi nia isin lolon ema nian rasik. Hare ba istória mundiál, arte iha nanis ona Erra Grésia antiga, no bele dehan katak, arte aparese ka iha no mosu hamutuk kedas ho prezensa umana iha mundu ida ne'e. Afirmasaun ida ne’e razoável liu tanba ezisténsia arte labele hafahe ka separa husi ezisténsia umana, ho lia-fuan seluk, arte eziste tanba iha ezisténsia umana, no sein ezisténsia uman, arte labele koñesidu.

Istorikamente Sosiedade Timor-Leste, hatur arte hanesan espresaun espíritu ne’ebé hatudu identidade kultural no moris ema nian hodi bele dignifika nia valor kultural, no kesi metin fiar espirituál ba obra ne’ebé espresa-ona liuhusi hamulak ka ko’alia, kanta, dezeñu, eskultura-ai, eskultura-fatuk. Lala’ok istória ne’ebé eziste ona tempu naruk ida ne’e hasoru mudansa kontraditóriu, tantu iha nia propózitu no esénsia hamutuk ho dezenvolvimentu sivilizasaun no intelektualidade umana. Istória ida ne’e lori ita ba literatura oin-oin no fonte literatura sira nia afirmasaun, katak inisialmente arte intimamente relasionadu tebes ho espresaun espíritu ka alma ema nian no kesi ho fiar ne’ebé ho forma májika no beleza natural. Katak fiar ida ne’ebé ho forma religiu-mágika espresa liu-husi mundu arte hanesan símbolu obediénsia ida. Ida ne’e akontese no deskreve nanis iha Erra Grésia antiga, no iha Timor-Leste, sosiedade sei iha fiar ba ida ne’e too ohin loron. Entaun ita bele konklui katak, arte kontein valor espirituál no metafíziku. Mezmu sosiedade Timor-Leste sei iha fiar katak arte kontein valor espirituál no metafíziku maibé iha rai seluk, paradigma ida ne’e hasoru mudansa ne’ebé signifikanté tebes tuir evolusaun umana, realidade barak hatudu iha deskrisaun arte ne’ebé iha Erra modernu no era postu-modernu, katak arte la ho forma religiu-mágika ona. Signifika iha Erra modernu no era postu-modernu, kestaun arte iha nia singularidade únika rasik. Singularidade únika ne’e hamosu husi observador no filózofu mundiál sira nia pontu de vista ne’ebé oin-oin kona-ba arte. Atu hatene diak liu kon-ba mudansa arte, kle’an liu iha The Liang Gie, Suatu Konsepsi Kearah Penertiban Filsafat.

Rezumu simples husi perpetiva arte iha sosiedade Timor-Leste mak, arte no ezistensia umana nu’udar kestaun inseparavel, tanba bazikamente arte hanesan espresaun espiritu ka alma ne’ebé furak liu husi propozitu no objetivu moris ema nian. Iha Timor-Leste, arte hanesan mos religiu-mágika, Katak fiar ida ne’ebé ho forma religiu-mágika espresa liuhusi mundu arte hanesan símbolu obediénsia ida. Ho nune’e, funsionalmente arte hanesan espresaun espiritu ka alama ne’ebé furak liu husi propozitu no objetivu moris ema nian. Universalmente sosiedade Timor mos hatur Arte hanesan espresaun espíritu ne’ebé hatudu identidade kultural no moris ema nian hodi bele dignificar nia valor kultural, hanesan identidade lisan, identidade knua, antesedénsia tradisaun no istória antiguidade tradisaun, kultura no kostumene’ebé espresa liuhusi hamulak ka ko’alia, kanta, dezeñu, eskultura-ai, eskultura-fatuk. No presiza tebes atu tau konsiderasaun ba tatto hanesan Espresaun arte ne’ebé  utiliza isin-lolon ema-nian nu’udar instrumentu atu espresa nia espíritu, espresaun ida ne’e hatudu poténsia artifisial husi mudansa no evolusaun ema Timor hodi bele dignifika nia valor kultural, hanesan identidade lisan, identidade knua, antesedénsia tradisaun no istória antiguidade tradisaun, kultura no kostume la’ós ona liuhusi hamulak ka ko’alia, kanta, dezeñu, eskultura-ai, eskultura-fatuk de’it maibé liu husi nia isin lolon ema nian rasik.

Perspetiva Sosiedade Timor-Leste Kona-ba Tatto

Iha sosiedade Timor-Leste nia hare, Espresaun arte utiliza isin-lolon ema-nian hanesan tatto (Caci, iha lian Fataluku) nu’udar injesaun eransa kultural kolonial mezmu Istorikamente iha rai-seluk utiliza nanis ona iha 3000 Ac. Iha mesir antiga, tuir mai husi ema Polinesia, Filipina, Kalimantan, Afrika, Norte Amerika, Amerika Sul, Mesoamerika, Europa, Japaun, Kamboja, inklui Tionghoa, no too mai iha Timor iha Tempu okupasaun Japaun, Feto Timor utiliza hodi livre husi, sai-atan seksual ba Militar Japaun.

Espresaun arte utiliza isin-lolon ema-nian hanesan tatto iha Timor-Leste seidauk konsidera hanesan Espresaun arte ne’ebé  utiliza isin-lolon ema-nian nu’udar instrumentu atu espresa nia espíritu ka alma umanu. Tatto sempre asosiadu ho kriminalidade, tanba ema lubuk balun ne’ebé utiliza tatto iha nia isin hanesan símbolu korajen ida hodi partisipa iha aktu krime, no media massa mos ábitua ho hatudu tatto ne’ebé iha ema nia isin hanesan indikadór baihira ema ruma partisipa iha krime ruma no/ka bainhira ema refere akuzadu hanesan suspeitu ba krime ruma. Kestaun ida ne’e indiretamente kondisioná sosiedade Timor-Leste hodi nafatin interliga tatto ho kriminalidade, katak ema ne’ebé iha tatto ne’e kriminozu, bandidu, eskavadora, ema-aat no seluk tan. Paradigma sosial ida ne’e kuda-an metin no aneksa ho tatto no tranzmite ho forma re-tranzmitidu too ohin loron liuhusi konstrusaun pensamento ne’ebé hamosu ba bei-beik husi influénsia media. No sosiedade nia perspetiva ba tatto nafatin ho kriminalidade. Ema ne’ebé iha tatto mos dala ruma bandu iha Komunidade sosiedade kulta balu, bandu atu tama iha grupu relijioza sira, bandu atu servisu iha instituisaun estadu no privadu, bandu atu sai traballadór iha fatin ruma tanba ignoránsia ne’ebé hatur nanis ona hodi liga nafatin tatto ho kriminalidade, idéntiku ho destruidór ba valor estrutura sosial, kultura no relijiaun, jeneraliza ema hotu ne’ebé iha tatto ne’e kriminozu no seluk tan.

Persesaun sosiedade kona-ba tatto la’o ho kondisaun diferente, iha ema balun halo tatto iha nia isin tanba espíritu ka alma umanu hanesan arte ida, iha balun ne’ebé hakarak hafurak isin tuir mudansa sosial ne’ebé barak liu iha tatto, iha mos motivu seluk mak iha hakarak hodi halo tuir ema seluk ne’ebé sai idola ka gosta ba tanba ema refere inspira hodi bele hatudu nia espíritu fiar-an liuhusi tatto, signifika tatto konsidera hanesan meiu atu hasae nia sentimentu fiar-an. Iha mos ema balun ne’ebé konsidera tatto hanesan dalan ne’ebé foti nia hodi halo interasaun ho ambiente sira ne’ebé besik nia. Mais realidade kondisaun sira ne’e soke tebes etika moral husi perspetiva sosiedade ne’ebé hare moral no etika tuir perspetiva kulta ne’ebé iha. Husi persesaun ne’ebé la’o hasoru tatto, tantu pro no mós kontra, mosu komprensaun ida katak, perspetiva negativa kona-ba tatto susar tebes atu halakon iha sosiedade, tanba husi perspetiva sira ne’e hotu utiliza barak liu sai sasukat hodi hare ema ne’ebé iha tatto mak hare de’it nia isin ne’ebé makerek maibé la hare husi nia etika moral nu’udar umanu ne’ebé iha sosiedade.

Perspetiva ida ne’ebé vizivel liu iha Erra ohin loron mak, ema ne’ebé iha tatto bele hetan impedimentu iha nia karreira iha instituisaun estadu no privadu sira, instituisaun sira ne’e bandu ka iha proibisaun atu nia funsionáriu sira iha tatto, kestaun refere dala ruma tanba sei iha kólerasun ho perspetiva negativu kona-ba tatto ne’ebé la’o iha sosiedade. Ema ne’ebé iha tatto mos hetan impedimentu atu hala’o atividade sosial hanesan doasaun raan, iha ne’ebé ema iha tatto labele fó dalan atu halo doasaun raan ho razaun médiku. Satan ema iha tatto no derrepente hetan kapturasaun ba polisia, polisia bele deside hodi baku, detein uluk antes halo investigasaun tanba sukat de’it husi tatto, la’ós husi aktu saida mak nia halo.

Kondisaun ida ne’e la’o nafatin ho perspetiva negativa, tanba ne’e artigu ida ne’e mai ho argumentu krítiku utiliza abordagem akademiku ho hanoin atu halo konxiensializasaun no hatur identidade hafurak-isin hanesan estetika ida, hodi nune’e bele prova katak, saida mak sosiedade hanoin kona-ba estereótipu ne’ebé negativu hasoru ema ne’ebé iha tatto, neineik sei rahun no/ka tohar, no sosiedade tenke konsidera tatto hanesan Espresaun arte ne’ebé  utiliza isin-lolon ema-nian nu’udar instrumentu atu espresa nia espíritu ka alma umanu.

Nu'udar meiu konxiensializasaun, sosiedade presiza hatene katak tatto la’ós idéntiku ho kriminalidade, tatto parte ida husi arte, ema ne’ebé iha tatto utiliza nia isin-lolon hanesan media ba espresaun espíritu, tatto mak espresa nia espresaun privadu ida, husi mensajen arte ida ne’ebé iha valor ba ema refere atu foti nia isin hodi espresa sai. Hanesan istória pasadu, momentu sira ne’ebé nakonu ho valor ne’ebé espresa liuhusi obra arte ida hanesan tatto. Segundu, iha satisfasaun individu, katak iha tatto, nia bele diferente ho ema seluk, no ikus-liu husi tatto mak nia bele hatur nia identidade ida hodi ema seluk bele hatene. Portantu, bele hateten mos katak, sosiedade tenke iha konxiénsia hosi simu tatto hanesan parte ida husi arte, no labele halo diskriminasaun ba ema ida tan de’it iha tatto, tanba em hotu-hotu hanesan umanu ida iha sosiedade ida, labele sukat nia kuadradu ho de’it tatto, tanba ema iha tatto la signifika nia la-eskola, nia la hatene buat ida, nia bandidu, no nia beik-teen.

Hanesan abordagem akadémiku, iha tatto ne’e desizaun umana, tatto hanesan parte husi arte, kada motivu ne’ebé utiliza iha isin-lolon bele hatudu karakterístika ema nian, aleinde ida ne’e, halo isin sai makerek ho tatto konsidera hanesan media tranzmisaun artístiku umanu. Tatto la koñese idade, tanba akumuladu sírkulu sosiedade hotu-hotu, tantu adultu, joven no labarik, feto no mane. Tatto mos valoriza hanesan arte únika iha isin lolon hodi hafurak isin ne’ebé iha tatto ba. Ho ida ne'e iha valor lubuk ida husi tatto mak hanesan;

- Tatto Kontein valor Kultura Sosial, tanba Tatto hanesan Espresaun arte ne’ebé  utiliza isin-lolon ema-nian nu’udar instrumentu atu espresa nia espíritu, espresaun ida ne’e hatudu poténsia artifisial husi mudansa no evolusaun ema Timor hodi bele dignifika nia valor kultural, hanesan identidade lisan, identidade knua, antesedénsia tradisaun no istória antiguidade tradisaun, kultura no kostume la’ós ona liuhusi hamulak ka ko’alia, kanta, dezeñu, eskultura-ai, eskultura-fatuk de’it maibé liu husi nia isin lolon ema nian rasik.

- Tatto Kontein valor Artístiku, liuhusi tatto, artista sira bele tranzmite obra artístiku umanu hodi ema hotu bele hare, bele senti katak, media tranzmisaun utiliza ba obra artístiku la’ós de’it, ai, fatuk, kanvas no seluk tan maibé ema nia isin-lolos mos parte ida husi media obra artístiku. Tatto la’ós de’it atu hafurak isin, maibé tatto bele fornese enerjia ne’ebé iha forsa tuir valor no filozofia dezeñu ida. Dezeñu iha isin-lolon ema nian sai ona parte husi arte no kultura sosial iha mundu hotu-hotu, ho nune’e liuhusi tatto, ema bele hetan nia identidade artístiku lolos husi valor umanu ne’ebé nia iha liu-husi poténsia artifisial tatto iha nia isin.

- Tatto sai reflexo ba ezisténsia sosiedade, espesifikamente sírkulu juventude, juventude sira hatur tatto hanesan ona identidade ba sira nia korajen nu’udar joven iha sosiedade, sírkulu juventude hahú ho nia korajen nakloke hodi hatudu sira nia identidade, sira sei senti satisfeitu tebes ho makerek iha isin, husi tatto sira sente bele ona foti sira nia espresaun liuhusi símbolu oin-oin, atu espresa sira nia sentimentu artístiku, sentimentu sosial, sentimentu kultural, sentimentu domin no paz ne’ebé ema labele hare tanba dala-barak, ema dehan joven mak autór kriminozu, tanba ne’e husi tatto ne’ebé ema hatur idéntiku ho kriminalidade, juventude bele espresa saida mak sira senti, tanba sira iha konxiénsia, katak sira mak jerasaun sosiedade nian ne’ebé lolos labele hetan diskriminasaun, julgamentu no akuzasaun hanesan autór kriminozu.

Ikus liu tanba, istória hatudu bainhira iha okupasaun Japaun, Feto Timor utiliza tatto hodi livre husi, sai-atan seksual ba Militar Japaun, entaun ita koko atu kontinua hakerek Movimentu Feto ho forma universal atu halo komparasaun iha Timor-Leste hodi bele halakon perspetiva patriarkal no hare liu ba perspetiva sosiedade kulta ne’ebé vizivel no klásika liu hare ba tatto no kuadradu feto hodi bele hatur tatto nu'udar arte ne’ebé foti isin-lolon hanesan media espresaun, no hatur feto hanesan parseiru igual ne’ebé hanesan ho mane hodi bele hetan espasu iha liña frente. No afirmasaun kontinua mai hanesan; Reprezentate Jéneru iha Perspetiva Movimentu Feminista, espesifika liu ba Feto ne’ebé iha tatto.

Títulu; Reprezentante Jéneru iha Perspetiva Movimentu Feminista “Feto ne’ebé iha tatto”

Hein iha Edisaun tuir mai…..

Obrigado ba Komprensun tomak…

Share to Google Plus

About Lospalos News

Lospalos News hanesan media ida ne'ebe eziste hosi ema Lospalos atu transmite informasaun sosial ba publiku no laiha interese ba kualker aspeitu ne'ebe iha relasaun ho osan. informasaun ne'ebe Lospalos News publika mai hosi fontes barak, ho intensaun atu publika tutan ba ema hotu ne'ebe presiza.