Primeiru Ministru, Rui Maria de Araújo husu ba populasaun hotu iha nasaun ne’e atu simu komunidade lesbian, gay, bisexual no transgender (LGBT) nudar timoroan.
Ema hotu iha poténsia atu kontribui ba dezenvolvimentu nasaun ne’e, inklui membru komunidade lesbian, gay bisexual no transgender.
Lia hirak ne’e hatete husi Primeiru Ministru, Rui Maria de Araújo, liu husi komunikadu ofisial gabinete primeiru ministru nian, ne’ebé diáriu ne’e asesu, horisehik.
PM Rui hateten, diskrimina dezrespeitu no halo aat ba ema balun tanba de’it sira nia orientasaun seksuál no identidade jéneru sei la fó benefísiu ba nasaun.
Timor-Leste koñesidu iha rejiaun no iha mundu internasionál hanesan nasaun ne'ebé promove no proteje direitu umanu. Maibé, ema barak mak sei hetan diskriminasaun inklui foin sa’e balu sei moris iha violénsia nia laran no mós komunidade LGBT. Dala ruma hahalok sira ne’e mai husi uma laran rasik.
Eis asesór Ministériu Finansas ne’e afirma violénsia no diskriminasaun ne’e krime. TL nia riku soin loloos mak nia ema, liuliu ba labarik no foin sa’e sira. Violénsia no diskriminasaun bele afeta ba futuru nasaun ne’e nian.
Tuir nia, nasaun ida atu dezenvolve ho di'ak, labarik hotu presiza moris iha ambiente ne'ebé fó protesaun, domin no oportunidade ba sira atu dezenvolve sira nia-aan la haree ba sira nia diferensa.
“Ha’u husu ba ita hotu atu simu malu, haree malu ho di'ak no respeita malu. Ukun Timor nian hanorin ita atu respeita malu, Maromak mós hanorin ita atu hadomi malu”, tenik nia.
Nu’udar primeiru ministru, nia husu ba inan-aman sira presiza simu-oan sira. Eskola presiza kria kondisaun ne'ebé proteje estudante hotu.
Prinsípiu husi nasaun demokrasia mak ema hotu moris livre ho dignidade no respeita ba malu, bele harii nasaun ida ne'ebé inkluzivu, atu ema hotu bele partisipa iha prosesu dezenvolvimentu. Aproveita ho di'ak independénsia ida ne'ebé uluk ema hotu luta.
Independente
0 komentar :
Post a Comment
Komentariu lao ho Etika