Munisipiu Lautem hahu'u simu poder lokal iha loron 24 fulan outubru tinan 2016, ne'ebe realiza iha Administrasaun Munisipiu Lautem, Lospalos Vila, no selebrasaun ba programa ne'e selebra hamutuk ho Komemorasaun loron Proklamasaun independensia unilateral Timor Leste nia ba dala 42 ne'ebe reliza iha loron 28 fulan novemru tinan 2016, iha Lospalos Vila, Munisipiu Lautem.
Dokumentasaun Badak
Estrada Munisipiu Lautem ne'ebe liga postu administrativu lautem ba postu administrativu Lospalos vila komesa sobu, maizumenus iha fulan outubru 2016 nia laran, ho objetivu atu rehabilita dalan ne'ebe a'at pior ona hodi prepara ba serimonia entrega poder lokal iha loron 24 fulan outubru tinan 2017 nomos komemorasaun loron Proklamasaun independensia unilateral Timor Leste nian ba dala 42 ne'ebe reliza iha loron 28 fulan novemru tinan 2016.
Tuir plano governo RDTL, komemorasaun loron Proklamasaun independensia unilateral Timor Leste nian ba dala 42 ne'ebe reliza iha loron 28 fulan novemru tinan 2016, sei realiza iha Munisipiu lautem hamutuk ho seimonia entrega poder lokal Minisispiu Lautem nian.
Planu sira ne'e hamahon iha Kriteria simples ida katak atu realiza Programa hirak ne'e, estrada ne'ebe liga ba Munisipiu refere tenke sufisiente oituan tamba sei partisipa hosi povu 12 munisipius hotu, ho nune'e governo fo projetu emergensia ba kompanhia lokal sira iha Munisipiu Lautem hodi rehabilita estrada ne'ebe liga hosi postu administrativu Lautem ba postu administrativu Lospalos vila, tamba estrada refere sai dalan publiku ka estrada kategoria nasional ne'ebe liga Kapital Nasaun ba Munisipiu Lautem.
Tuir informasaun hosi komunidade, inklui mos autoridades balun, Estrada refere hetan tender hosi Kompahia 2 hodi rehabilita emergensiamente iha fulan hirak nia laran antes tama ba programa entrega poder lokal Minisispiu Lautem nian nomos komemorasaun loron Proklamasaun independensia unilateral Timor Leste nian. Estrada ne'e sobu iha maizumenus fulan outubru tinan 2016 nia laran, no la konsege rehabilita ate agora.
Ho dokumentasaun badak iha leten, autor espresa opiniaun kikoan ida hanesan tuir mai:
Povu Lautem sai Vitima Prossesu Dezenvolvimentu
Pedasu ida hosi fraze ne'e hatudu signifikante ida katak Dezenvovimetu hanesan palavra eh liafuan majika ida ne'ebe sempre sai hosi governasaun ida nia ibun wainhira ema husu. Iha tempu ne'ebe deit, Iha Fatin ne'ebe deit, iha situasaun ne'ebe deit, reprezentante povu iha governasaun ida sempre ema grita no hakilar liafuan Dezenvolvimentu hanesan referensia ordenada ida ba padraun politika ne'ebe diak hodi bele lori sia ba sussesu Dezenvolvimentu nasaun.
Ema hotu-hotu fiar katak governasaun Timor Leste ne'e garante tebes Estabilidade no Dezenvolvimentu nasional, maibe dala ruma ba munisipiu sira seluk, laos Munisipiu Lautem. Tamba sa?
Hanesan ita hotu hatene, ema barak konta istoria oin-oin konaba prossesu Povu Timor luta ba Independensia, iha lider istoriku balun mos konta, katak Lospalos nia ulun fatuk malirin maka tahan netik ita hodi bele hetan Independensia, dala ruma los karik ita hanoin ba los mai los, maibe karik mos sei hamosu diskriminasaun waihira ita koalia konaba rai Timor. (Le iha Istoria Krize 2006).
Istoria hirak ne'e mosu diak tebes no ema barak gosta hodi konta tutan, maibe realidade hatudu katak heroi Timor ne'ebe hosi Lospalos rasik desrekonhese oituan hosi Governo RDTL. (Le dokumentasaun Foti restus mortais saudozu Nino Konis santana ih Ermera).
Timor iha ona Independensia no agora dadauk tama ona ba tinan 15 nia laran, Dezenvolvimetu saida maka tama ona Munisipiu Lautem, Menus tebes wainhira kompara ho Munisipiu sira seluk, Projetu bobot tama Munisipiu Seluk, Munisipiu Lautem so hein fo parabens deit tamba governo servisu ho diak, Ikus mai mosu Liafuan, Lospalos ne'e ulun malirin tebes no iha espiritu nasionalsmu ne'ebe bo'ot, rekonhese nafatin servisu governo. (Karik ne'e los, Ema Lospalos hanoin liu Timor duke nia a'an rasik).
- Waihira ema hotu koalia sira nia luta durante prosses funu, Ema lospalos so hein deit atu hateten katak, husik ami milisia, no Istoria mak sei bele konta lia los.
- Wainhira ema hotu koalia sira nia matenek, Lospalos so hein atu hateten dei katak, husik ami beik, importante mak ami nia kontribuisaun ba Timor iha valor tuir ami, maske ho deit espiritu nasionalismu ne'ebe bo'ot.
- Waihira ema koalia progressu dezenvolvimentu ba sira nia Munisipiu, Lospalos nafatin hein hodi hateten katak, maske Lospalos baku ain iha fatin maibe ami la husu buat hotu ba governo, tamba povu ne'ebe diak maka povu ne'ebe husu ba nia a'an rasik saida mak nia halo ba nia nasaun.
Liafuan hira ne'e sai ona baze espiritual ida hodi hametin espiritu nasionalizmu ema Lospalos nian ba Timor, no Losaplso sei la husu ba governo atu hodi Dezenvolve rai Lospalos.
Maibe liga ba kestaun Estrada ne'ebe liga postu administrativu Lautem ba postu administrativu Lospalos vila, Povu Lospalos nafatin kestiona tamba Maske estrada ne'e a'at durante tinan barak ona, maibe sei diak netik atu Komunidade utiliza tamba sei iha Aspal, maibe agora Sobu tiha no abandona deit nune'e, oinusa?
Tempu Bailoron, Povu Lospalos raut malu ho rai rahun, Tempu Udan, povu Lospalos halimar tahu, ida ne'e maka hanaran Dezenvolvimentu? Karik ne'e Lae, tamba ne'e hanaran hanehan dignidade povu..!
Ba kestaun estrada ne'ebe governo fo fiar ba Kompanhia sira hodi sobu ne'e presija kontrola didiak hodi nune'e bele rehabilita fila fali, tamba Povu Lospalos la husu governo atu halo Aspal maibe tambasa sobu tiha maka husik hela sai a'at pior hanesan ne'e? Estrada ne'e hanu'u hosi postu administrativu lautem ba postu administrativu Lospalos vila ho nia naruk kuaze 30 Kilometru, ne'e sobu no abandona deit sai a'at..!
Ho naran, Povu Lospalos tomak, informa ba publiku no liu-liu ba partes kompetentes iha governo RDTL hodi bele foti medidas lalais ba kestaun Estrada Lospalos ne'e, tamba fulan sia (9) ona, estrada ne'e abandona deit hosi kompahia no la rehabilita ate a data.
Z-Ray
Le Mos: Profil Munisipiu Lautem
0 komentar :
Post a Comment
Komentariu lao ho Etika