"Alterasaun Klimátiku sira ita labele nega no hanesan ameasa boot ida ba mundu agora daudaun no ba futuru hosi ita nia planeta. Ita labele para asaun ne'ebé iha relasaun ho klima no ha'u apelu ba nasaun sira iha mundu tomak atu mantén foku, atu kontinua empeñadu iha akordu sira Paris nian hodi benefisia ita tomak", afirma hosi sekretáriu-jeral ONU nian ba jornalista sira bainhira hakotu Fórum Internasional Saun Petersburgu nian, iha Rúsia.
Prezidente norte-amerikanu, Donald Trump, fó sai ona iha loron-kinta saída hosi EUA nian hosi Akordu Paris - asina iha tinan 2015 hosi kuaze nasaun 200 no ratifika hosi nasaun 147 -, hodi hatete katak paktu ne'e "hamosu beibeik desvantajen" ba ekonomia no ba traballador sira norte-amerikanu nian, no hato'o proposta atu halo fali negosiasaun ba ida ne'ebé "di'ak" no "justu liu".
"Kona-ba sosiedade norte-amerikanu, ha'u senti konvensidu tebes katak estadu sira, sidade sira, komunidade emprezarial sira, sosiedade sivil sei kontinua iha empeñu no sei aposta iha ekonomia verde, tanba hanesan ekonomia futuru nian", António Guterres hatutan.
"Sira ne'ebé maka aposta iha akordu sira Paris nian no iha ekonomia verde maka hanesan sira ne'ebé sei iha knaar importante ida iha ekonomia hosi sékulu XXI nian", nia hakotu.
Portugal ratifika ona akordu Paris nian iha loron 30 Setembru 2016, sai nune'e nasaun dalima hosi Uniaun Europeia ne'ebé maka halo no nasaun 61 iha mundu.
Akordu istóriku nia "arkitektu" sentral sira maka Estadus Unidus, iha tempu ne'ebé ho prezidénsia hosi Barack Obama, no Xina, no kestaun ne'e fahe simeira hosi G7 foin lalais ne'e iha Sisília, ho líder tomak afirma fali nia kompromisu kona-ba akordu ne'e, maibé Donald Trump la halo.
SAPO TL ho Lusa
0 komentar :
Post a Comment
Komentariu lao ho Etika