LOSPALOS NEWS ||©
================
Lospalos Vila; 23-Maiu-2020
------------------------------------
Lospalos News; 23-Maiu-2020, Juventude Suku Com, Postu-Lautém, Munisípiu Lautém Komemora Loron Restaurasaun Independénsia Timor-Leste ba dala XVIII ho programa, “Sidadaun ida, ai-oan ida” ne’ebé hatur nu’udar Programa Nasional husi Exelénsia Presidente Repúblika Dr. Francisco Guterres Lú-olo. Sentidu husi programa kuda ai-oan iha komemorasaun loron Restaurasaun Independénsia Timor-Leste hanesan asaun agradesimentu povu Timor-Leste tomak ne’ebé ukun-an ona durante tinan 18, katak ukun-an hanesan ho ai-oan ida ne’ebé kuda desde 1975 iha funu laran to’o referendum 1999 no restaura iha 2002, no uku-an ida ne’e sei kuda no kuda ba beibeik hodi hatur nasionalismu jé-rasionál ba jerasaun foun Timor-Leste.
“Hanesan ita hotu hatene, ita Presidente Repúblika Exelénsia Presidente Repúblika Dr. Francisco Guterres Lú-olo iha nia hanoin, nia hatur Programa Nasional ida ho tema “Sidadaun ida, ai-oan ida”, programa ida ne’e pertense ba Konservasaun Ambientál ida, no ami juventude Suku Com lori ida ne’e sai Programa ida iha komemorasaun loron Restaurasaun Independénsia Timor-Leste ba dala XVII ho hanoin ida fó agradesimentu ba Povu Timor-Leste tomak atu kuda nafatin ukun-an hanesan ai-oan ida ne’ebé kuda desde 1975 iha funu laran to’o referendum 1999 no restaura iha 2002, no nu’udar jerasaun foun, ami iha responsabilidade hodi kuda no kuda ba beibeik hodi hatur nasionalismu ne’ebé forte ba ami” (Ze-Repu, Responsavel Ekipa Kuda ai-oan).
Responsavel Ekipa, Nu’udar mos Universitáriu FASPOL esplika, “Objetivu espesífiku ba programa refere ne’ebé bele hakesir juventude suku com sira mak, Halibur Juventude no hametin unidade juventude iha suku com, implementa papél juventude hodi kontribui ba Suku Com, hatudu no kria modelu foun no di’ak iha suku com, objetivu sira ne’e nu’udar parte ida atu komemora loron independénsia Timor-Leste nian.”
Iha programa kuda ai-oan refere, Juventude Suku Com hamutuk 91 Pessoas no konsege kuda ai-oan hamutuk 43 inklui halo nia lutu, no kontinua to’o atinze ema ida ai-oan ida iha loron balun tuir mai. Ai-oan sira ne’e sei kontrola husi Juventude sira rasik no sei entrega ba konsellu suku bainhira Situasaun Estadu Emerjénsia hotu no Juventude sira Komesa hala’o atividade ida-idak nian. Ai-oan sira ne’e kuda iha area tasi ibun no mós iha kampu Futeból ninin iha Aldeia Vailovaia.
Iha komunikasaun ho Ekipa Lospalos News “Ze-Repu” hateten, "Juventude sira konsidera atuál Presidente Repúblika Dr. Francisco Guterres Lú-olo hanesan inspiradór ba juventude tanba bele foti fali vizaun ida ba sidadaun Timor-Leste tomak, liu-liu foin-sa’e sira atu konxiente oinsá konserva, prezerva no próteze ambiente sira, hodi nune’e Timor bele matak nafatin no nakonu ho ai-horis di’ak sira." Nia kontinua, "mezmu Timor-Leste iha hela situasaun COVID-19, iha ne’ebé husi Nasional to’o baze laiha selebrasaun ba komemorasaun loron Restaurasaun Independénsia Timor-Leste hanesan dada bandeira, ho nune’e ita prienxe ho programa kuda ai-oan atu juventude bele senti netik independénsia ida ne’e ho símbolu ida ba komunidade sira mak, Joven ida, ai-oan ida, hodi nune’e bele hafurak mos natureza Suku Com nian."
Fonte : Ze-Repu, via WhatsApp ba Lospalos News.
0 komentar :
Post a Comment
Komentariu lao ho Etika