BOXE NO KLASE SOSIAL (Perspetiva Istória Sosiedade) PARTE I

 

PARTE I

Simplifika de'it iha ensaiu simples ida ne'e, katak; Boxe la'ós de'it nu'udar desportu, maibé nu'udar mós atividade ne'ebé reflete ba iha dinámika sosiál. Hanesan tinan kotuk iha Kampeonatu Nasionál Boxe Amadora Timor-Leste, 2023, eventu ne'e foti tema jerál ida katak "Boxe, dalan ba Desportu Popular no Progressu sosiál". Baze husi tema ne'e atu loke espasu hanoin ida ba sosiedade Timor-Leste, katak Boxe iha Timor-Leste ne'ebé dau-dauk ne'e sai unika modalidade desportu ne'ebé halo balansu kompetitivu tebes iha nasaun jigante sira iha Sudoeste Aziatiku reflete tebes mós ba dinámika sosiál iha Timor-Leste, espesifiku-liu iha kontradisaun klase entre klase baixa no klase altu iha Timor-Leste.

Iha Istória Timor-Leste, hafoin independénsia, Boxe hakat-ona husi divertimentu no entretenimentu brutal ba símbolu konxiensia klase, no kuaze sai nu'udar espasu ida mós ba rezisténsia kontra injustisa sosiál sira iha Timor-Leste. Maske nune'e, iha mós Boxista tuan sira ne'ebé dau-dauk ne'e la la'o tuir-ona prinsipiu ukun rasik-aan ne'ebé sira hodi iha sira nia envolvimentu iha rezisténsia ba Independénsia Nasionál, iha ne'ebé sira barak partisipa mós iha akontesimentu 12 de Novembru 1991, maibé dau-dauk ne'e desmoralizadu iha prinsipiu no sai ona liman-ain klase alta hodi opresa klase baixa sira.

Hahún ba antecedénsia simples ne'e, iha ensaiu ne'e koko atu fó perspetiva ida ligadu ho Boxe no Klase sosiál haree husi sikun Istória sosiedade nian, biar la espesifiku ba Istória sosiedade Timor-Leste, maibé jeralmente sei koloka pensamentu lubuk ida tuir análize ne'ebé fora husi buat ne'ebé ita simu loron-loron sai ona toman maske ladún lo'ós ka ema matenek sira hanaran ignoránsia. 

1. Boxe iha era Pré-Modernu 

Iha era Pré-Modernu nia laran, Boxe nia funsaun hanesan entretenimentu brutal ne'ebé diverte sirkulu klase baixa "Ema Kiak" sira. Bain-bain jogu sira ne'e loke husi klase alta "Ema Élite" sira nu'udar divertimentu no entretenimentu, aumezmu sai mós instrumentu Akumulasaun kapital "Dalan hodi akumula osan". Mezmu nune'e sira "Ema Élite" sira halo kamuflaze katak ne'e jogu entretenimentu atu hakotu konflitu sosiál sira. Siginfika husi ne'e mak bele halakon ema baku-malu ka problema iha fatin-fatin. Hanoin sira hanesan ne'e mosu iha era Pré-Modernu Europeu no Amérikanu sira, enkuantu iha Sosiedade Sudoeste Aziatiku, liu-liu iha Timor-Leste, ita sei konserva hela pensamentu hanesan, ne'ebé injeta hela mai ita. Sira hahú hamosu hanoin seluk hodi hametin sira nia interesse ba Akumulasaun kapital liu-husi Boxe, entaun sira muda fali husi narativu Boxe nu'udar instrumentu hodi hakotu konflitu sosiál ba fali kultura desportiva ne'ebé ita tenke submete-aan ba hodi labele liga Boxe ba konxiensia klase no rezisténsia sosial.

Husi ne'e, importante tebes atu ita hateke ho kle'an no intende saída konxiensia klase iha kontestu desportu Boxe. Simplesmente, konxiensia klase nu'udar konxiensia ida husi ema indivíduu no/ka sosiedade ida hodi hatene ninia pozisaun iha estrutura sosiál no ekonomia, inklui mós iha kompreensaun katak nia parte husi sosiedade ne'ebé hasoru hela opresaun no explorasaun. Entaun, iha kontestu Boxe, liu-liu iha sirkulu Boxista, Boxista barak moris husi klase Baixa "Ema Kiak" ne'ebé envolve iha Boxe ho hanoin atu bele tranforma ninia moris ekonomia. Ida ne'e kuaze hanesan ho kondisuan Boxista Timor-oan sira, liu-liu Boxista husi El-Matador Boxing Club ne'ebé maioria mai husi Klase Baixa, ne'ebé hamahon-aan iha klube refere hodi foti Boxe sai nu'udar símbolu rezisténsia kontra mahukun sira. Iha klube ne'e sempre foti Ring Boxe nu'udar espasu hodi reflete luta ba klase baixa hodi kontra injustisa sosiál no ekonomia iha sosiedade Timor-Leste.Biar iha parte seluk, Boxista sira mós vinkula sira nia esperansa iha Boxe atu responde nesesidade ekonómiku. (Hakat).

Istorikamente Boxista Muhamad Ali sai ezemplu konkretu ida, iha nia moris nu'udar Boxista, nia la'os tuku-malu de'it iha Ring, maibé nia expresa kontra injustisa sosial, inklui dezigualidade rasial no opresaun oin-oin no explorasaun Ema ba Ema. Ezemplu, bainhira nia kontra militar obrigatóriu ba invazaun Amérika iha Vietname. Husi ninia expresaun kona-ba direitu sivil no buat oin-oin hatudu forma konxiensia klase iha Boxe.

Atu bele komprende konxiensia klase ho kle'an, mak iha ensaiu ida ne'e ita aprezenta referénsia teoria di'ak ida hodi ita bele vizita mak hanesan tuir mai:

1. Livru: The Communist Manifesto (1848)

Hakerek husi: Karl Marx & Friedrich Engels

Edisaun ne'ebé uza iha ne'e mak: Oxford University Press, 2008, (Página 14–19 kona-ba "Perjuangan kelas dan pentingnya kesadaran kelas pekerja. (Númeru pajina bele diferente iha edisuan seluk, maibé konteudu hanesan).

2. Livru: The German Ideology (1846)

Hakerek husi: Karl Marx

Edisaun ne'ebé uza iha ne'e mak: International Publishers, 1970, (Página 37-52, Parte I kona-ba "Feuerbach: Opposition of the Materialist and Idealist Outlooks" ne'ebé aprezenta "bagaimana ideologi kelas penguasa mempengaruhi kesadaran kelas pekerja". (Númeru pajina bele diferente iha edisuan seluk, maibé konteudu hanesan).

Fin husi Parte I husi ensaiu mak ida ne'e, sei iha Parte sira tuir mai, no nafatin akompaña hodi ita estuda hamutuk utiliza plataforma Online.

Hakerek na'in: #ZRayArt

Share to Google Plus

About Lospalos News

Lospalos News hanesan media ida ne'ebe eziste hosi ema Lospalos atu transmite informasaun sosial ba publiku no laiha interese ba kualker aspeitu ne'ebe iha relasaun ho osan. informasaun ne'ebe Lospalos News publika mai hosi fontes barak, ho intensaun atu publika tutan ba ema hotu ne'ebe presiza.