"Buat ne'ebé maka nasaun presiza, agora duké antes, maka serteza. Tanba asegura número boot hosi votu sira no hosi fatin sira [iha parlamentu] iha eleisaun lejislativu sira, hanesan klaru katak partidu Konservador de'it no Partidu [Demokrátiku] Unionista maka iha lejitimidade no kapasidade hodi iha providénsia ba serteza ne'e hodi kontrola maioria [absoluta] ida iha Kámara Komun sira", nia hatete iha diskursu ida iha odamatan hosi rezidénsia ofisial, iha Downing Street.
May afirma ona katak sei kontinua serbisu ho "belun no aliadu sira" hosi Partidu Demokrátiku Unionista, maibé la klarifika katak sei forma koligasaun ida ka halo de'it akordu parlamentar ida.
"Ami nia partidu rua iha nafatin relasaun forte ida kleur ona no ne'e fó konfiansa mai ha'u hodi fiar katak ami sei konsege serbisu hamutuk iha interese hosi Reinu Unidu tomak nian", nia garanti.
Primeira-ministra refere ona katak "Governu ne'e sei lori nasaun liuhosi negosiasaun importante sira ba "Brexit", ne'ebé hahú loron 10 tuirmai, no konkretiza vontade hosi povu britániku hodi hasai Reinu Unidu hosi Uniaun Europeia".
Nia hatutan katak sei "serbisu hodi mantén nasaun seguru bainhira implementa mudansa sira" ne'ebé promete ona hafoin "atake aat sira iha Londres no Manchester, bandu extremizmu islamita no sira ne'ebé maka apoia, no fó ba polísia no ba autoridade sira poder ne'ebé sira presiza hosi mantén nasaun seguru".
Líder hosi partidu Konservador destaka katak nia governu sei promove prosperidade no mobilidade sosial.
"Sei koloka justisa no oportunidade sira iha sentru hosi buat hotu ne'ebé halo hodi ami bele kumpri promesa "Brexi" nian hamutuk no iha tinan lima oinmai ita harii nasaun ida ne'ebé laiha ema ida no mós komunidade ida hela ba ikus", nia hatutan.
Deklaradu hosi fatin 649 hosi fatin 650 iha Kámara Komun, partidu Konservador hili ona na'in 318, menus ualu duké ida ne'ebé presiza hodi hetan maioria absoluta ida no menus hosi 12 duké sira ne'ebé maka iha antes eleisaun sira.
Partidu Traballista adisiona ona na'in 32 ba na'in 229 ne'ebé maka sira iha antes, ho total deputadu na'in 261.
Partidu Nasionalista Eskosés konkista ona fatin 35 (menus 21), Liberal Demokrata sira fatin 12 (aumenta fatin 3), Partidu Demokrátiku Unionista (Irlanda-Norte) fatin 10 (aumenta fatin 2), Sinn Féin hetan fatin hitu (aumenta fatin 3), nasionalista galés sira hosi Plaid Cymru hetan fatin haat (aumenta 1), sira partidu Verde hetan fatin ida no eleitu ona ema independente na'in ida iha Irlanda-Norte.
SAPO TL ho Lusa
0 komentar :
Post a Comment
Komentariu lao ho Etika