Jornalismu laos Krime ida

Opiniaun ida ne’e la bazeia ba elementu diskriminativu eh assediu no defarmasaun ruma, katak opiniaun ida ne’e bazeia ba konsagrasaun Kontituisaun RDTL Artigu 40 no 41 konaba Liberdade ko’alia no informasaun ninian ho Liberdade imprensa no komunikasaun sosiál ninian.

Akuzasaun Ministériu Públiku hasoru Jornalista Raimundus Oki iha Tribunal distrital dili sei invalida konsgrasaun Konstituisaun RDTL artigu 40 no 41 tamba kondena rezultadu servisu jornalista ho kodigu penal.

Signifika fo importansia liu ba sentimentu personalidade duke sentimentu publiku, fo importansia ba dignidade pessoal duke dignidade komum.

Analizasaun logika hatudu mai ita iha kompativu entre konsgrasaun rua(2), ida maka Konstituisaun RDTL no ida seluk Kódigu Penál Justisa.

Kontituisaun RDTL Artigu 40 konaba Liberdade ko’alia no informasaun ninian, konsagra katak:

1. Ema hotu-hotu iha direitu ba liberdade ko’alia nian no direitu atu hetan informasaun ruma, no tan informasaun loloos nian.
2. Liberdade ko’alia no informasaun ninian labele hetan limitasaun hosi sensura ruma.
3. Lei maka sei regula direitu no liberdade ne’ebé temi-sai iha artigu ida-ne’e, ho baze iha imperativu kona-ba respeitu ba Lei-Inan no respeitu ba ema idaidak nia dignidade.

Tuir mai Kontituisaun RDTL Artigu 41 konaba Liberdade imprensa no komunikasaun sosiál ninian, konsagra katak;

1. Iha garantia ba liberdade imprensa nian no ba meius seluk tan kona-ba komunikasaun sosiál.
2. Halo parte liberdade imprensa nian, liberdade ko’alia nian no hamoris/hakiak jornalista sira, asesu ba fontes kona-ba informasaun, liberdade editoriál, protesaun ba independénsia no ba segredu profisionál no mós direitu atu halo jornál, publikasaun ninian no meius difuzaun selu-seluk tan.
3. Labele permite monopóliu kona-ba meiu komunikasaun sosiál sira.
4. Estadu hametin liberdade no independénsia ba órgaun públiku kona-ba komunikasaun sosiál, husi podér polítiku no podér ekonómiku.
5. Estadu hametin ezisténsia ba servisu públiku ida ba rádiu no televizaun, ne’ebé sente livre, haree mós ba objetivu seluk, hanesan protesaun no divulgasaun kona-ba kultura no tradisaun Repúblika Demokrátika Timór-Leste nian, no fó garantia ba ema ida-idak atu hateten nia hanoin rasik.
6. Estasaun emisora ba radiufuzaun no rádiu televizaun nian bele hala’o de’it ho lisensa tuir lei haruka.

Liga ba konsgrasaun Kódigu Penál Justisa Artigu 285 konaba Denúnsia kalunioza, Katak;

1. Ema ne’ebé, ho meiu naran ida, iha autoridade nia oin ka publikamente, ho konxiénsia katak imputasaun ne’e falsu, denunsia ka soe suspeita katak ema ida halo krime ida, ho intensaun atu halo ema ne’e hasoru prosedimentu kriminál sei hetan pena prizaun too tinan 3 ka multa.
2. Kuandu ajente halo imputasaun falsu kona-ba ilísitu kontra-ordenasionál ka dixiplinár, pena sei hetan atenuasaun extraordinária.
3. Kuandu funsionáriu ne’ebé iha obrigasaun atu hala'o prosedimentu kriminál maka promove dolozamente faktu deskritu iha númeru anteriór sira pena aplikavel nia limite mínimu no másimu sei agrava datoluk ida.

Wainhira konsgrasaun rua (2) refere ita liga ba malu, no halo analize komparativu, sei hatudu importansia determinante balun, katak importante liu maka Liberdade ko’alia no informasaun ninian ho Liberdade imprensa no komunikasaun sosiál ninian ka Denúnsia kalunioza.

Denúnsia kalunioza koalia konaba sentimentu no dignidade personalidade, individu, partidaria no partes determinates, Liberdade ko’alia no informasaun ninian ho Liberdade imprensa no komunikasaun sosiál ninian koalia konaba intereses komun, nessesidade publiku, nomos satisfasaun Komun.

Los no klaru katak Kódigu Penál Justisa aplika ba povu tomak, maibe diferente ho jornalista, tamba jornalista iha funsaun ne’e diferente ho ema bain-bain, eh entidade seluk, katak:

1. Jornalismu Funsiona hanesan Fornesedor informasaun ba publiku (povu)
2. Jornalismu Funsiona hanesan kontruidor ba publiku (povu)
3. Jornalismu Funsiona hodi garante direitu sidadun eh publiku (povu)
4. Jornalismu Funsiona hodi esprime direitu sidadaun eh  publiku (povu)
5. Jornalismu Funsiona hanesan sosiedade demokratika ba publiku (povu)

Ho nune’e karik  failansu informasaun eh notisia hosi jornalista eh media ruma, kondena ho Kódigu Penál Justisa, entaun ita rasik estraga ita nia nasaun ho estadu diteitu demokratiku ida ne’e iha mundu nia matan, no se los maka atu eleva tan jornalista nia funsaun karik ita kondena sira ba Tribunal no ikus mai fo pena prizaun, signifika dalan ida ne’e sei hamate Liberdade ko’alia no informasaun ninian ho Liberdade imprensa no komunikasaun sosiál ninian ne’ebe konsagra ona iha Kontituisaun RDTL Artigu 40 no 41.

Ita hotu hatene katak, Lei Jornalistiku iha Timor-Leste ladun sufisiente hodi regula jornalistas Sira , maibe ita hotu fiar katak jornalistas Timor hotu Sempre lao ho nia Etika, karik iha Failansu ba iha Informasaun eh notisia ne'ebe Sira publika, sei iha termu seluk hodi atende, laos fo pena, tamba fo pena ba jornalista sei hamate vontade no prestasaun jornalista sira.

Iha ne'e ita laos konsidera jornalismu hanesan parte ida ba jornalista Sira hodi buka Moris iha ne'eba, maibe tamba Sira iha espiritu ba nasaun ne'e rasik hodi transmite informasaun hanesan dalan ba progressu dezenvolvimentu nasaun nian.

Laiha jornalista ida maka halo aktividade jornalistiku no sai riku, maske lao ho kolen, kosar buka informasaun, hodi halo notisia ba publiku, tamba Ho hanoin ida mesak maka progressu nasaun ne'e rasik nomos nia funsionamentu nudar formesedor informasaun.

Kualker se deit, eh entidades ne'ebe deit maka hakarak fo pena ba jornalista hanoin luan liu tan, Ema barak nia sentimentu boot liu duke sentimentu pessoal, diginidade publiku boot liu duke dignidade pessoal, karik ita nia jornalista balun halo ona  Denúnsia kalunioza ema eh entidade, maka hakarak fo pena entaun buka tuir uluk sira ne'ebe maka hafoer no sama ona diginidade nasaun Timor-Leste.

Ikus liu, Ita hotu sei hein desizaun ikus hosi Tribunal ne’ebe sei deside iha Loron 01 fulan junnu tinan 2017, katak, se lezada husi Sr. Rui Maria de arauzu ne’e los, no fo pena ba Jornalista Raimundus Oki entaun Liberdade ko’alia no informasaun ninian ho Liberdade imprensa no komunikasaun sosiál ninian ne’ebe konsagra ona iha Kontituisaun RDTL Artigu 40 no 41 sei mout hanesan Kompaheiru Amito Konusere Arauju hateten.

Hakerek nain : Z’ray Muamalay

Share to Google Plus

About Lospalos News

Lospalos News hanesan media ida ne'ebe eziste hosi ema Lospalos atu transmite informasaun sosial ba publiku no laiha interese ba kualker aspeitu ne'ebe iha relasaun ho osan. informasaun ne'ebe Lospalos News publika mai hosi fontes barak, ho intensaun atu publika tutan ba ema hotu ne'ebe presiza.