RAAN BE FAKAR
Kintál ne’e sei hanesan uluk
ho kantu ki’ikoan be hateke maramaran
no fihir uluk nian sei haliik kona fuan
ho brinkedu labarik nian be uut
Tempu naruk no ida-idak namkari husi ne’e
no kurva ki’ikoan be uluk sai faról hahú meak
uluk iha kalan aat ikan-ruin belit iha kakorok
domin dala uluk mate iha baioneta sidun
Kleur loos ona no rai-bokon ne'e nakfera rahun
odamatan nia ferrujen maka nakliik ho fitar sira
ho tadak uluk nian sei metin iha anin, atu lahaluha
tristeza uluk nian be mai no liu ho grilu nia hananu
Sei mai, nehek sira sei mai, nonook hanesan uluk
ho labadain sira be harii knuuk hamoris fatin ne’e
du’ut no rai-rahun nia halerik hein ó-nia moris-hi’as
ho ai-hun nia abut, lolon, sanak no tahan hafanu kalan
Ohin ho loron be aas nakali, iha-ne’e ha’u nakdedar
hirus, kosar ho malirin hein janela be nakloke ba kalan
no liman-kukun rohan book an dolar iha rai, atu lahaluha
raan be fakar, kanek be maran ho ó-nia iis be kotuk
Díli, 28/11/2020
Savio Ma’averu
0 komentar :
Post a Comment
Komentariu lao ho Etika